無綫取景

要睇維多利亞港景色，除咗去山頂，仲有一個更快嘅方法，就係去司徒拔道觀景台，同樣係搭 15 號巴士，但只需一半路程，在「白壁」分站便到達。

司徒拔道觀景台以往都是不少大陸團必到之處，因為睇香港夜景，上山頂好花時間，去呢度慳一半時間，景觀與山頂相差不遠，最重要是，這裡可以短暫泊車，有廁所，最適合作短暫停留。

另外，司徒拔道觀景台亦是無綫常用的場景，包括《香港雲起時》（1989）、《笑星救地球 － 九七前後》（1990）、《家族榮耀》（2021）等等，真係數之不盡。作為常用場景的原因同樣簡單，香港夜景很代表香港，有泊車位，有廁所，最重要是只有架巴士經過，沒有行山徑經過此處，日間的遊客相對較少，加上是政府管轄休憩範圍，可租借場地封場拍攝，作為拍攝場地就十分合適。

雙循環線

中國近年講「雙循環」，其實巴士路線也有「雙循環」。記得在 80 年代，九巴曾經開過 1K / 2K 這組「雙循環」路線，1K 為南行循環線，2K 則是北行循環線，兩條巴士路線是行經相同地方，但 1K 是順時針循環，2K 則是逆時針循環，簡單講，即是好似日本 JR 山手線內環線 / 外環線設計。

1K / 2K 巴士線主要用作當時地鐵接駁用途，但由於乘搭人次不高，90 年代初已經取消這兩條線了。最近去置富花園，才發現原來香港還有一組真正的雙循環巴士線 ── 城巴 37A / 37B。37A 是逆時針循環，由置富花園經黃竹坑進入香港仔隧道，再經過灣仔、金鐘、中環，再到西區上薄枎林道、瑪麗醫院，最後返回置富花園。37B 則是順時針循環，由置富花園經瑪麗醫院到堅尼地城，再沿中環、金鐘、灣仔進入香港仔隧道，經黃竹坑後，最後返回置富花園。

由於工作關係，星期一晚我搭了四轉城巴，包括三轉 37B 及 37A，無論是 37A 還是 37B 都十分快，因為路上冇車，乘客也不是特別多，讓我了解這對罕見的雙循環線。

大型 QR Code

「疫苗通行證」今日開始實施，進入商場要掃 QR Code，尋晚已經有好多人分享青衣城嗰個有一個人咁高嘅 QR Code，畀人離遠都有得掃。其實超大型 QR Code，今個月頭响黃大仙廟已經見到，仲要响部電視上顯示，保證夠光可以掃到。

而家我食住花生期待銅鑼灣 SOGO 嗰塊 CVISION 大型 LED 屏幕顯示超大型 QR Code，肯定成為銅鑼灣打卡熱點。

往返火炭

去火炭，好多人都會選擇搭火車，不過火炭站同工廠區都有一段距離，所以我都好少搭火車去火炭工廠區，而响工廠區內，有一楝商業大廈十分出名，叫做「沙田商業中心」，花名叫「玻璃屋」，响沙田一帶搭的士，你話去「玻璃屋」，相信絕大部分的士司機都識去。由火車站行去玻璃屋都有一段距離，而且整條路都冇瓦遮頭，所以我去玻璃屋，都係响屋企搭九巴 85 直接在總站「火炭(山尾街)」落車。

近年，位於黃竹洋街的駿洋邨正式入伙，火炭區又多了一個巴士總站，由屋企去火炭，可以搭 85X 去大老山隧道轉 88X ，計埋等車時間有時快過搭一程 85，就算第二程追唔到 88X，可以考慮搭 88 去沙田大會堂追 85 或 285 號亦得。至於由火炭返屋企，就可以响大老山隧道搭 75X 或 85X，邊架嚟先就搭邊架，尤其係九巴响晚上八點後減班次，見車就上，慳番啲等車時間。

搭屯馬綫

呢兩年來，我每個月都買九巴月票，所以絕大部分時間都係搭九巴。尋晚去咗牛潭尾做嘢做到晚上八點幾，本來諗住搭 76K 去 Yoho Town 轉車出九龍，但尋晚天氣凍，加上落雨，等等吓見到架新界的士，立即上咗車，用咗 $50 到元朗西鐵站，見時間已經去九點幾，諗諗吓直接搭屯門綫算數。

其實由元朗搭屯馬綫去土瓜灣都幾快，MTR 官網話 31 分鐘，如果計上車/落車計就真係 31 分鐘，好彩係我去到元朗站，等四分鐘就有車。不過 $20.8 車費就有啲貴，如果唔係咁夜咁凍兼落雨，真係唔會搭佢。

疫情生活

而家响香港，日日幾千人中招，尋晚同一位身在美國嘅朋友傾偈，除咗問我有冇工開，仲問我有冇中病毒。講起美國，原來好多人都中咗招，佢做測試發覺自己中咗，但只係咳咗幾日就好返晒了，所以如果問我驚唔驚中招，心諗：有乜好驚？

我而家份工，成日出街做嘢，由於我用九巴月票，加上地鐵人多，所以絕大部分時間都係搭巴士，坐九巴上層最前位吸少啲二手空氣，望吓風景心情十分舒暢，尋晚八點幾搭 108 返屋企，經過銅鑼灣，條街冇乜人，十分冷清，Sogo 八點幾已經關門大吉，街上嘅人都係等搭巴士走人，今次第五波疫情係咪令好多人驚？我唔知，不過令好多人冇心情就肯定嘅。

淘寶買嘢

本人唔係成日上淘寶買嘢，因為我買嘢好實際，要見過實物先會買，唔好話淘寶，上網買嘢嘅機會都好少，但有啲嘢係冇辦法唔上網買唔得，例如數年前上 Amazon 買 Parker Sonnet 鋼筆咀，因為香港買 Parker 咀，要攞香港買筆的證明，但我支 Sonnet 買咗 10 幾年，冇可能證明到在香港買，而且我想在一支平價 Sonnet 改用 18K 鍍銠筆咀，個筆咀幾有彈力。

最近我去淘寶買咗兩卷玻璃纖維膠紙（Filament Tape），聲稱係 3M Scotch 思高原廠，不過係唔係原廠都冇乜所謂，响淘寶買嘢冇諗住買到真貨。要响淘寶買，主要係香港好多舖頭冇得賣，我去文具舖問，佢話叫我去五金舖買，去五金舖，佢就叫我去文具舖問，最後搵到都係响網上商店先見到。上香港網上舖買，隨時買咗淘寶貨，既然上網買，不如上淘寶算數，費時畀人响中間食價。

究竟我在淘寶買了多少卷？兩卷而已，因為有排用，一卷 3M 8915（20mm × 55米）18.92 人仔（唔知點解個價錢咁騎呢），兩卷 37.84 人仔，大陸運香港自取點運費 5.5 人仔，扣淘寶幣 1.13 人仔，實收 42.21 人仔，用香港支付寶畀錢，實收 $52.01，即係一卷 26 蚊，香港買可能差唔多價或者貴少少，如果用完，下次會响香港網上商店買卷試吓先。

拉門升降機

香港現時也有不少舊式升降機，但基於安全考慮，很多手拉門升降機已經轉為半自動或全自動門，好似最近到清風街一幢舊式洋樓，見到一部 Schindler 舊式升降機，外門採用推/拉門設計，內門則是自動式趟門，十分特別，所以拍一條片留個記錄。

磨刀神器

話說本人身上有一把萬用刀 Victorinox Cyber Tool S，用了 20 年，最常用的工具就是大刀與螺絲批（因為經常「開箱」和「開機」），一把刀用得耐，始終有鈍的一日，所以把刀已經磨過無數次，但最近發現愈來愈難磨利，所以一直想買一個較好用的磨刀器。最近去荃灣千色店，見到一個日本製磨刀器，售價 $79.9，不太昂貴，所以買來試試。

買返屋企，第一時間將軍刀在磨刀器拖幾下，刀鋒變得很鋒利，相信可用大半年後才需要再次使用磨刀器，如果想磨不鏽鋼刀，不妨到千色店買一把返來用。

墨芯移植

有一次在深水埗某文具店上，有一個同學仔想買一支「墨水筆」（中港台大多數叫「鋼筆」，日本就叫做「万年筆」），店長給了一支最平的鋼筆給她，但她問鋼筆有沒有墨，店長說到，鋼筆必須另外買墨，最後這個同學仔沒有購買了。本來想同這個同學仔講：「香港大創（Daiso）有 $12 鋼筆賣，仲送一支墨芯！」不過這位同學仔，轉個頭已經離開了，唔見咗。

如果有留意我 Facebook 的朋友，都知道小弟在淘大的大創買了一支日本 Platinum Riviere 鋼筆，$12 一支（咁平因為係祖國製造）。雖然很便宜，但寫起來都十分暢順，所以一直放在工具袋內備用。另外，早年有一位朋友在日本買了一支 2,000 円的 Platinum 鋼筆（型號不詳），最近因為吸墨器漏墨，已很少用。

前兩天，小弟忽發奇想，既然兩支都是 Platinum 鋼筆，兩支鋼筆的墨芯應該可以交換吧，所以嘗試將 Riviere 的墨芯換到 2,000 円 Platinum 鋼筆上，倒轉放半天，結果成功引墨上咀，寫了過千字也沒有斷墨，十分不錯。由放那支 2,000 円 Platinum 鋼筆採用「中細」筆咀，寫幼字十分細緻，用來寫信就十分合適，而這支 2,000 円 Platinum 鋼筆將取代 Riviere，放在小弟的工具袋內備用。

頭痛救星

昨晚瞓得唔好，今日起身好頭痛，本來今朝想寫稿，結果痛到寫唔落手，結果再瞓，但痛到瞓唔著，唯有搽白花油响額頭，以「乸」攻痛，可頂大約一小時，所以今日就搽了三次，瞓到下午四點，最後今日沒有工作，起身只是寫稿，寫完之後再寫這篇網誌，記下今日頭痛一事。

麗斯戲院

今日經過黃大仙中心正德街 20M 小巴站，忽然仔細望望站頭的小巴站牌，發現站牌上寫上「麗斯戲院」，起初還以為是越秀廣場前身，但站牌上同時包括越秀廣場，再想一想，越秀廣場的前身應是曾經是全港最大戲院「麗宮戲院」。小弟的印象，「麗斯戲院」應該在旺角，在新蒲崗的麗斯戲院又在哪裡？

在網上找尋相關資料，原來新蒲崗麗斯戲院前身是「英華戲院」，英華戲院於 1967 年開幕，共有 1,454 個座位，院主叫盧林，當年他同時經營英京、榮華、寶華等戲院。大約在八十年代尾九十年代初，英華改名為麗斯戲院，2005 年戲院結業，現在變成安老院。

亦即是說，小巴站站牌至少有 16 年歷史！

相關資料：衍慶街：電影、美食與故事

電氣化火車

「電氣化火車，返工返學要靠佢～」，唔知大家有冇聽過呢首廣告歌？以前覺得火車好快，但唔知乜嘢原因，車速近年好似慢咗，我查過維基百科，東鐵綫最高時速是 120km/h ，但今日搭 277E 由上水出沙田（去到大老山隧道過對面馬路轉車），途中咁啱見到一架韓製列車經過，所以用電話拍低。巴士最高時速 70km/h，畀盡佢都係 80km/h，但竟然與東鐵綫列車並排行，證明我個感覺冇錯，火車真係慢咗。至於點解，我冇研究，反正我由上水去沙田都係搭巴士而唔搭東鐵綫。

荃灣西約

講到荃灣西，大家相信會想到荃灣西站一帶，其實真正的荃灣西在「荃灣西約」，即是灣景花園、麗城花園、東南工業大廈、江南工業大廈一帶的位置，以前要去這個地方，必須在荃灣市中心乘搭小巴，或者轉乘經過青山公路荃灣段的巴士。近年，九巴在上下班時間開設西隧過海線，除了早前乘搭過的 936 外，亦開設往返荃灣西約的 934 。

這條線由灣仔菲林明道開出，本身是一個巴士分站，沒有站頭，可說是以特別班次開出，由灣仔到麗城花園，只需 35 至 40 分鐘，真係話咁快就到。不過，夜晚由麗城花園返灣仔就沒有班次了，要乘搭巴士到沙咀道轉乘城巴 930X ，時間長一點，亦要行駛至荃灣工業中心才直上高速往西隧。

交通津貼

今日可以取得 2021 年 12 月的交通津貼了，小弟是買九巴月票搭九巴的，九巴月票有效期 30 日，而 12 月有 31 日，要攞盡交通津貼，最簡單的方法，就是分別在 12 月 1 日及 31 日分別買九巴月票（$780×2），$1,560 再加上非九巴交通費用（例如新巴、城巴、綠色小巴等），要攞盡 $500 交通津貼絕對冇問題，小弟今個月就攞盡交通津貼了。

不過，2022 年的交通津貼門檻及上限已經調整了，門檻由 $200 上調至 $400，上限由 $500 下調至 $400，下個月開始的交通津貼將相應下調。

打磚坪街

今日由土瓜灣去葵涌打磚坪街，本來諗住搭 6C 去深水埗轉 31B，但去到巴士站剛剛見到 6C 走咗，開九巴 app，發現 12A 就到，於是到對面馬路上 12A，在海壇街轉 31B，因為 12A 上午去深水埗隨時快過 6C，所以整體時間仲快咗。

去完打磚坪街攞嘢，回程返灣仔，12:15 見到 936 在中午 12 點尾班車，本來諗住追唔到，點知原來由總站去到打磚坪街差不多用了半小時，但由打磚坪街去到中環都不需半小時！唔怪得 936 係「載空國際」嘅皇牌線，上車的人少，我有點懷疑車上所有人的車費都只能付西隧隧道費！

ＡＶ分體

不知從何時開始，「家庭影院比兩聲道衰聲」一直成為不少兩聲道玩家的印象，家庭影院玩環繞聲、玩聲效，兩聲道要聲音結像，家庭影院在 90 年代開始流行，到現時為止，玩兩聲道的人依然大有人在，兩聲道的市場依然穩定，反而家庭影院的市場反覆，只要有新制式，就會有一班玩家一窩蜂去玩，當遇到制式停滯不前的時間，玩家庭影院的人便熱冷卻。其實，家庭影院系統能否營造出有如兩聲道系統的質素？筆者一直認為是有可能的，問題是用家需要花更多金錢，花更多時間去設定系統。舉個例說，一套簡簡單單，而又有一定質素的兩聲道系統，至少也需要萬多元預算吧，假如聲道數目與預算成正比，只要在器材選購與設定得宜，例如一部 Marantz AV8802 配搭一套有力的後級，再加上有一定質素的喇叭與幾百呎空間，相信要達到兩聲道的水平亦不是天方夜譚。不過要達到以上的標準，就已經不是普通人能做到了。

一種緣份

今日是香港電視（ HKTV ）開台一個月之日，熱情過後， HKTV 直播的觀眾人數降至大約 20 萬，本人估計 HKTV 直播加點播的收看人數可維持在 30 萬左右。這種「三分鐘熱度」的態度其實很常見，就好似 Kashy Keegan 這位歌手一樣，又有幾多人記得他是誰？他 15 年前在英國已經開始創作音樂，為了要在錄音室錄歌，他要做非正常時間上班的工作，可惜一直無機會找到唱片公司為他出碟，只能將音樂放上網站分享。有一日，王維基竟然用了 Kashy Keegan 在 2007 年創作的〈 This Is My Dream 〉作為 HKTV 的宣傳歌曲（亦是《挑戰》的主題音樂）。 HKTV 不獲發牌，香港市民與 HKTV 員工在政總舉行集會， Kashy Keegan 隻身來港唱這首歌曲，後來更在港舉行一個小型演唱會。其後更放棄在英國的工作，到香港這個他完全不熟悉的地方發展。 Kashy Keegan 的第一張實體唱片在香港推出，相信連他自己在數年前也估計不到，希望大家在熱情過後，不會忘記這位唱〈 This Is My Dream 〉的英國人吧。

全景相片

今日路過荷里活廣場，中央廣場竟然沒有攤位，趁有時間影一張全景相。

景觀: KIU WAI LAM 的 荷里活廣場

長期充電

還記得兩年前剛剛用 Galaxy Nexus ，由於不是經常上網，聽網台都是採用離線方式下載，每次充電可以連續用兩天，所以我以往不需使用外置電。使用一段時間後，發覺上網時間愈來愈多，有時會用手機 Facebook 更新狀態，亦經常打手機遊戲，今年用 Plantronics BackBeat GO 藍牙耳機聽歌兼作免提通話，結果朝早充電，未返到屋企已經唔夠電，最終都變成「尿袋一族」，搭車返屋企，邊用手機邊充電。另外，使用 BackBeat GO 一段時間後，發現了另一個問題，就是此藍牙耳機的使用時間只有 4 小時左右，有時搭長途車，使用藍牙耳機聽網台，未返屋企已經沒有電。早前 Plantronics 推出 BackBeat GO 2 LE ，配備充電袋，除了可放耳機，更內置電池，放在袋內可以為耳機充電，朝早搭兩個多鐘車去廣州，夜晚搭兩個多鐘車回港，中間時間放入袋充電，返到屋企，可以連袋充電。據說充電袋將會獨立發售，價錢不是太昂貴，值得留意。