《但願人長久》短評

今個星期日（4 月 21 日）係全港戲院日，全港戲飛 $30，本來很難買飛，但發現九展星影匯《但願人長久》 9:55pm 場次還有很多位，所以當天直接去戲院買飛，屋企食完晚飯之後再搭車去九龍灣睇，反正我由九展返屋企都係搭 10 分鐘車，所以唔怕夜。

電影整體上是很平淡，沒有甚麼驚人劇情、沒有扭橋，純睇故事可能會覺得悶，但只要留意畫面部分，就能看出不論導演還是演員花了很多功夫，當中有一幕令我印象深刻 ── 林子缺（袁澧林飾）向著家姐林子圓（祝紫嫣飾）說，老豆（林覺民，吳慷仁飾）老咗好多，佢好似縮咗水咁樣，就發覺吳慷仁扮演曾是癮君子的 60 歲「老人」，就感覺到佢真係好瘦，瘦到有點病態，吳慷仁拿不到最佳男配角確實有點可惜。

至於故事內容，不在此詳述了，Google 都可搜尋到大量資料，反而想講講電影的一些缺點。《但願人長久》用畫面說故事，對白不多，但部分畫面冇聲，完全沒有配樂，其實很難推進觀眾情緒，從而帶領觀眾進入劇情。這是否因為預算問題，令到配樂部分有所不足？還是導演祝紫嫣的刻意安排？看到 End Credit 的時候，發現去到一半之後已經完全冇音樂，最後結論，我估計是預算限制。假如在配樂上做得完整一點就更加完美了。

《美帝崩裂》短評

早幾日趁有時間睇《美帝崩裂》（Civil War），有人話香港個譯名唔好，唔貼切，查實香港改西片名主要係吸引人去睇，改「美國內戰」邊夠吸引。不過譯名唔係重點討論嘅話題。今次想講吓電影內容，究竟我睇咗啲乜。

故事一開始就講加州同德州組成一個叫「西部力量」（Western Forces），去進攻華盛頓，簡單來講即係「白宮淪陷」啲 friend，但睇睇吓發覺唔係「乜乜淪陷」，反而似一套講述幾位記者（一個著名戰地女記者、女記者同事、兩位記者嘅上司，以及一名新仔）出發去華盛頓嘅公路故事，幾位記者在沿路看到內戰的悲慘景像，中間有冇死人？因為費時劇透就無謂講了。以為 A24 低成本冇乜戰鬥場面，但最後四分一竟然又變咗「乜乜淪陷」，節奏加快，快到有好多應該慢慢交代嘅情節睇唔切，睇完都唔明，要睇網上嘅詳細解說先知當中的轉折位做緊乜，冇辦法，真係打仗時間，「乜乜淪陷」喎，好多嘢根本冇時間諗，何況將佢放入電影內的最後四分一部分？

最後想講，呢套絕對係一套虛構故事，故事係出於美國總統做三任總統，令兩個立場大相逕庭嘅大州（一個民主黨票倉，另一個係美國本土立場鮮明嘅共和黨州份）合組「西部力量」。要出現一個人做三任總統的情況，現實上也很難成立，所以加州同德州組成聯盟去攻擊華盛頓政府根本冇可能。出現呢個故事設定，當然係考慮到「最大公約數」問題，不同立場的美國人都睇得舒服自在。睇返事後報導，根據調查，有 52% 觀眾自稱係左翼，而 17% 就自稱右派，開畫票房不俗，香港觀眾反應亦唔差，尤其係「Hong Kong? China!」嗰幕，聽講有人因為呢幕要再入場睇多次，有冇咁誇張？