疫情生活

而家响香港，日日幾千人中招，尋晚同一位身在美國嘅朋友傾偈，除咗問我有冇工開，仲問我有冇中病毒。講起美國，原來好多人都中咗招，佢做測試發覺自己中咗，但只係咳咗幾日就好返晒了，所以如果問我驚唔驚中招，心諗：有乜好驚？

我而家份工，成日出街做嘢，由於我用九巴月票，加上地鐵人多，所以絕大部分時間都係搭巴士，坐九巴上層最前位吸少啲二手空氣，望吓風景心情十分舒暢，尋晚八點幾搭 108 返屋企，經過銅鑼灣，條街冇乜人，十分冷清，Sogo 八點幾已經關門大吉，街上嘅人都係等搭巴士走人，今次第五波疫情係咪令好多人驚？我唔知，不過令好多人冇心情就肯定嘅。