2016年4月26日星期二

廣州之行:天河城

【上文提要】廣州之行:廣州地鐵一日票



香港已經夠多商場,來廣州又竟然去行商場?冇錯,去到廣州,除了買一張一日票,第一時間就是搭地鐵去天河城,由廣州東站去天河城只需搭兩個站,落車在體育西路 C 出口經地庫 AEON 就可以上天河城,這絕對是大型商場的傳統設計,大型超市總是在地庫,而食肆、遊戲機中心就位於最高幾層。



大陸商場我都去得多,但去咁多大陸商場都有一個特色,就係人流低,就算好似深圳金光華、萬象城、KK MALL 等,只是食肆那層較多人,整體的人流就有如我屋企附近的紅磡廣場,感覺上較冷清。廣州天河城奇就奇在,人流很高,由地庫到七樓都一樣很多人,而且後生仔特別多,今次去六樓的「環遊嘉年華」探路,早上 11 點已經「一家大細」一齊打機、夾公仔了。不過,人流高的商場通常消費高,例如下午到江南宴食飯,兩個人消費兩百蚊人仔,老老實實,有點昂貴。

下一篇:廣州之行:二次創作?

2016年4月7日星期四

廣州之行:廣州地鐵一日票

【上文提要】廣州之行:坐直通車



去到廣州,第一件事就係去天河城,最平最快嘅方法就梗係搭廣州地鐵啦,但去廣州之日係星期日,好多人搭地鐵之餘,仲要有唔少人購買單程票,排隊過程中,發現原來有「廣州地鐵一日票」及「廣州地鐵三日票」發售,售價分別為 ¥20 及 ¥50 ,只要在票務中心畀錢就可以買到,一日票仲要係計 24 小時,即係 10:30am 買,可以用到下一日的 10:29am ,聽落十分抵。



不過咁,一般搭廣州地鐵都是由兩蚊到五蚊人仔不等,就算由機場南搭到去佛山都係 11 蚊人仔,買一日票搭地鐵隨時用唔晒廿蚊。由於廣州東站實在太多人排隊買單程票,最終都係買張一日票搭車。不過,我發覺自己冇買錯,因為我全日搭了幾程車,計落冇 ¥20 都有 ¥18 ,最重要係成日都唔駛排隊買單程票,慳咗極多時間,尤其是夜晚嗰兩程車,見到排隊條龍,我估計最少都排半個鐘,諗起都一額汗!

下一篇:廣州之行:天河城

2016年4月4日星期一

廣州之行:坐直通車

【上文】廣州之行:有乜準備?


▲ 九廣通特等位有餅乾同水一杯,全部香港製造。

至於講到上廣州,就有好多方法,如果住新界,最快同最平的方法就梗係搭車上深圳,再搭車,例如响羅湖過關行幾分鐘去深圳站搭城際列車去廣州東站或廣州站(舊站),由香港去羅湖貴極都係 $48.3(假設搭港鐵由柴灣去羅湖),深圳站去廣州東/廣州最平 ¥79.5 人仔,搭頭等都係 ¥99.5,唔想有人企响你隔離,就最好揀頭等啦。


▲ 韶山 8 型電力機車


▲ 九廣通採用瑞士 Lok 2000 型電力機車以一首一尾推動。

但如果唔介意貴少少或者住市區,就可以選擇坐直通車,紅磡上車,廣州東站落車,用兩地兩檢,車程約兩個鐘,同一出發地點比較,返大陸搭城際會慢少少,但主要係東鐵綫車程都要 40 分鐘,而且分兩程車,等車都用咗唔少時間。另外,直通車有分香港車「九廣通」同大陸「韶山 8 型」準高速列車,兩架都係行電,大陸車係全部 $210 一等位,而車廂分兩層嘅「九廣通」就有 $250 特等位,送一杯水同一塊餅,個位大少少(一行三個位),第一次坐或者冇位都可以試試。




▲ 九廣通車廂採用日本近畿車輛雙層客車。

下一篇:廣州之行:廣州地鐵一日票

2016年4月3日星期日

廣州之行:有乜準備?

基本上,小弟一年至少去兩次廣州,兩次都係去睇音響展覽,詳情就不在此多說,反正大家都沒有興趣,但上個月去廣州,主要係趁假期去玩兩日,我經常去大陸,到底有甚麼要準備呢?



如果想返大陸上 Facebook,第一件事要做的就是買一張中港上網卡,例如去廣州,就可以買張廣東香港兩用上網卡,面值就 $129,在深水埗桂林街與汝州街交界有一個「綠檔」專賣 SIM 卡,响呢度買乜卡都好平,唯獨是中港卡唔係平好多,因為中港卡一向有好多人買,呢個檔都要賣 $98,比起日本上網卡 $228 面價,實際賣價 $75 真係差得遠。

如果買上網卡,多數都會畀中國聯通 SIM 卡,聯通 3G 係用香港版,所以香港手機都用得到,但用嘅時候要記住依照指示,手動設定 APN 做「3gnet」,以及啟動「數據漫遊」,但換番自己張 SIM 卡前,記得關閉「數據漫遊」功能!雖然大陸好多地方都有免費 Wi-Fi ,但好多時要用電話號碼收 SMS ,加上上唔到 Facebook ,用 VPN 或者翻牆有時都未必上到,所以都係買張中港上網卡吧啦!

下一篇:廣州之行:坐直通車