大潭半日遊

今日下午得閒，食咗個下午之後諗緊去邊，忽然見到架 106 九巴，見有月票响身，未諗定去邊上咗車先，最後在鰂魚涌落車，經柏架山道自然徑去大潭水塘。

柏架山道自然徑入口在海山樓旁邊，要搵入口相信冇乜難度，不過由於是地平面上山，所以頭一個鐘路程都是上斜，氣力一般的我，都是慢慢行，每見到廁所就放低二兩，洗個面。另外，路上亦可欣賞到山下景色，例如下圖右方就是康怡花園。

跟住經過大風坳涼亭再休息一下，在分岔路口轉右，落斜住大潭水塘，見到大潭上水塘石橋，所以行過去影幾幅相再一直行。

原來大潭上水塘石橋一直行，會在高處的引水道一直走，離大潭水塘愈來愈遠，以為冇路返大潭水塘，原來行大半個鐘左右，會與衛奕信徑第一段交疊，可直接轉左落山。

跟住路牌去大潭篤水塘，沿大潭中水塘的一段路都頗難行，沒有行山鞋就切勿行了，中間會經過山澗的。

去到大潭中水塘水壩之後的路就易行得多，直達大潭郊野公園南門，直接搭新巴 14 號返筲箕灣。

大型 QR Code

「疫苗通行證」今日開始實施，進入商場要掃 QR Code，尋晚已經有好多人分享青衣城嗰個有一個人咁高嘅 QR Code，畀人離遠都有得掃。其實超大型 QR Code，今個月頭响黃大仙廟已經見到，仲要响部電視上顯示，保證夠光可以掃到。

而家我食住花生期待銅鑼灣 SOGO 嗰塊 CVISION 大型 LED 屏幕顯示超大型 QR Code，肯定成為銅鑼灣打卡熱點。

往返火炭

去火炭，好多人都會選擇搭火車，不過火炭站同工廠區都有一段距離，所以我都好少搭火車去火炭工廠區，而响工廠區內，有一楝商業大廈十分出名，叫做「沙田商業中心」，花名叫「玻璃屋」，响沙田一帶搭的士，你話去「玻璃屋」，相信絕大部分的士司機都識去。由火車站行去玻璃屋都有一段距離，而且整條路都冇瓦遮頭，所以我去玻璃屋，都係响屋企搭九巴 85 直接在總站「火炭(山尾街)」落車。

近年，位於黃竹洋街的駿洋邨正式入伙，火炭區又多了一個巴士總站，由屋企去火炭，可以搭 85X 去大老山隧道轉 88X ，計埋等車時間有時快過搭一程 85，就算第二程追唔到 88X，可以考慮搭 88 去沙田大會堂追 85 或 285 號亦得。至於由火炭返屋企，就可以响大老山隧道搭 75X 或 85X，邊架嚟先就搭邊架，尤其係九巴响晚上八點後減班次，見車就上，慳番啲等車時間。

搭屯馬綫

呢兩年來，我每個月都買九巴月票，所以絕大部分時間都係搭九巴。尋晚去咗牛潭尾做嘢做到晚上八點幾，本來諗住搭 76K 去 Yoho Town 轉車出九龍，但尋晚天氣凍，加上落雨，等等吓見到架新界的士，立即上咗車，用咗 $50 到元朗西鐵站，見時間已經去九點幾，諗諗吓直接搭屯門綫算數。

其實由元朗搭屯馬綫去土瓜灣都幾快，MTR 官網話 31 分鐘，如果計上車/落車計就真係 31 分鐘，好彩係我去到元朗站，等四分鐘就有車。不過 $20.8 車費就有啲貴，如果唔係咁夜咁凍兼落雨，真係唔會搭佢。

疫情生活

而家响香港，日日幾千人中招，尋晚同一位身在美國嘅朋友傾偈，除咗問我有冇工開，仲問我有冇中病毒。講起美國，原來好多人都中咗招，佢做測試發覺自己中咗，但只係咳咗幾日就好返晒了，所以如果問我驚唔驚中招，心諗：有乜好驚？

我而家份工，成日出街做嘢，由於我用九巴月票，加上地鐵人多，所以絕大部分時間都係搭巴士，坐九巴上層最前位吸少啲二手空氣，望吓風景心情十分舒暢，尋晚八點幾搭 108 返屋企，經過銅鑼灣，條街冇乜人，十分冷清，Sogo 八點幾已經關門大吉，街上嘅人都係等搭巴士走人，今次第五波疫情係咪令好多人驚？我唔知，不過令好多人冇心情就肯定嘅。

本土消費

大家記唔記得「肥仔開倉」最出名嗰句口號呢？嗰句就係「唔使上淘寶，唔使去深水埗」！深水涉可以同淘寶齊名，都係因為一個「平」字，所以有時我成日去深水埗買嘢。話說今日去了深水埗買支投影機吊架，鴨寮街興利專賣大陸 NB 架，好似圖中嘅 NBT718-2，售價 $180，平又唔係真係好平，但去到興利一定有貨，而且興利開朝早十點，買完上午即裝都得。

雖然上淘寶買同一支架平好多，但都要 99 蚊人仔，加埋香港段運費同匯率，大約要 $135，仲要等兩三日先到香港，如果趕住用，等得淘寶都瞓覺啦，不如推動吓本土經濟，响香港買好過！

回某Ｆ氏

响「比賽回顧」文章中，某Ｆ氏問我有冇龍威 Office 電話，我已經在文章連結上回覆閣下了，請 click 以下連結觀看：

https://lamkiuwai.blogspot.com/2008/04/blog-post_03.html

雖然我間中會停用 Facebook，但 Facebook Messenger 仍可正常收發訊息，各位 Facebook 朋友如果有乜事可以响 Facebook Messenger 搵到我。

淘寶買嘢

本人唔係成日上淘寶買嘢，因為我買嘢好實際，要見過實物先會買，唔好話淘寶，上網買嘢嘅機會都好少，但有啲嘢係冇辦法唔上網買唔得，例如數年前上 Amazon 買 Parker Sonnet 鋼筆咀，因為香港買 Parker 咀，要攞香港買筆的證明，但我支 Sonnet 買咗 10 幾年，冇可能證明到在香港買，而且我想在一支平價 Sonnet 改用 18K 鍍銠筆咀，個筆咀幾有彈力。

最近我去淘寶買咗兩卷玻璃纖維膠紙（Filament Tape），聲稱係 3M Scotch 思高原廠，不過係唔係原廠都冇乜所謂，响淘寶買嘢冇諗住買到真貨。要响淘寶買，主要係香港好多舖頭冇得賣，我去文具舖問，佢話叫我去五金舖買，去五金舖，佢就叫我去文具舖問，最後搵到都係响網上商店先見到。上香港網上舖買，隨時買咗淘寶貨，既然上網買，不如上淘寶算數，費時畀人响中間食價。

究竟我在淘寶買了多少卷？兩卷而已，因為有排用，一卷 3M 8915（20mm × 55米）18.92 人仔（唔知點解個價錢咁騎呢），兩卷 37.84 人仔，大陸運香港自取點運費 5.5 人仔，扣淘寶幣 1.13 人仔，實收 42.21 人仔，用香港支付寶畀錢，實收 $52.01，即係一卷 26 蚊，香港買可能差唔多價或者貴少少，如果用完，下次會响香港網上商店買卷試吓先。

打拼未來

今日睇國仁 post 嘅新片，向 20 年前的有線電視節目《打拼未來》數碼奇雲（７哥）專訪致敬，快啲 click 入嚟睇！

拉門升降機

香港現時也有不少舊式升降機，但基於安全考慮，很多手拉門升降機已經轉為半自動或全自動門，好似最近到清風街一幢舊式洋樓，見到一部 Schindler 舊式升降機，外門採用推/拉門設計，內門則是自動式趟門，十分特別，所以拍一條片留個記錄。

磨刀神器

話說本人身上有一把萬用刀 Victorinox Cyber Tool S，用了 20 年，最常用的工具就是大刀與螺絲批（因為經常「開箱」和「開機」），一把刀用得耐，始終有鈍的一日，所以把刀已經磨過無數次，但最近發現愈來愈難磨利，所以一直想買一個較好用的磨刀器。最近去荃灣千色店，見到一個日本製磨刀器，售價 $79.9，不太昂貴，所以買來試試。

買返屋企，第一時間將軍刀在磨刀器拖幾下，刀鋒變得很鋒利，相信可用大半年後才需要再次使用磨刀器，如果想磨不鏽鋼刀，不妨到千色店買一把返來用。

台灣火鍋

疫情之下，飲食生意難做，尤其是做任食火鍋，基本上是以晚市為主，午市都是做套餐或定食。現在下午六點停晚市，外賣火鍋根本冇得做，所以好多做飲食生意的店舖都開始轉型，下午時間唔「落場」，由下午 12 點做到 6 點，並將午市的任食時間縮短至 90 分鐘，套餐時間則縮短至 60 分鐘。

昨日經過尖沙咀加拿芬廣場，見到「牛大人」食到飽台灣火鍋，除了任食之外，還有一小時定量火鍋，即是指定肉類份量，例如牛五花加豬梅肉（150g）火鍋，每位 $98 ，星期五、六、日、假期、前夕加 $10，再加一，實收 $118.8，除了兩碟肉，其他菜類、腸類、丸類、飲品都是任飲任食，海鮮就可以加錢買，總括來說，牛大人以量來說算是抵食，只要一小時狂食一定可「食到飽」。另外一個特點，就是一人一鍋，台灣的辣，在口內久久不散，不是個個都喜歡，一人一鍋，想食甚麼湯底，就不需遷就其他人了。

牛大人：尖沙咀分店限定午市

水塘一遊

早兩日去金山郊野公園行馬騮山，年初二又再行過，不過今次的行程與上次不同，上次行了整條金山路再行小路去石籬邨離開，今次行金山路只是行了一小段，再經山路行到石梨貝水塘、九龍接收水塘、九龍副水塘，經長源路返回大埔道，即是返回起點位置。

除了金山路一小段之外，其他路段也見不到獼猴身影，相信馬騮在金山生存多年，懂得生存之道，只會在人多的地方等食物（今日又見到馬騮搶背心膠袋），進入石梨貝水塘，一隻馬騮仔也見不到。另外，這條路徑的景色也十分不錯，加上難度極低，很適合一家大細一齊行。

除了靠路上的指引外，現時使用 Google Maps 導航也十分準確，就算是部分位置的手機訊號接收不理想，亦可靠全球定位系統 GPS 準確定位，只要預先載入地圖，在離線情況下也能看到大概位置，就能避免行錯路了。

2022車公靈簽

2022 年牛年車公靈簽。

第三十八簽．中簽
人板高尾求真菜，我向低邊拾芥薑；
媚奧不如去媚灶，莫教步獵逞英豪。

自身：自求多福　財運：可有財運　訴訟：和解為佳
行人：在途中　　生育：可得女孩　出行：不宜
事業：守業為佳　姻緣：可成　　　家宅：興旺
搬遷：原地較佳　疾病：小心血熱


附錄：歷年簽文

2021 45中簽
下手須教一酌先，世情局面苦徒然；
積薪歷火非無事，識者能知火未燃。

2020 92中簽
人生何在逞英豪，天理人情只要公；
天眼恢恢疏不漏，定然作福福來縱。

2019 86中簽
石田為業喜非常，畫餅將來未見香；
怎曉田耕耘不得，郎知餅食不充腸。

2018 21中簽
頃畝之田歲月深，祖宗創積到於今；
勸君勿論多和少，寸土原來一寸金。

2017 61上簽
傳來信息果無差，轉運時來自興家；
篤志雲程須著力，何天今日賜榮華。

2016 72上簽
丹鳳飛舞去朝陽，大展翔毛彩色香；
來儀偏向仁者宅，修福自然啓禎祥。

2015 20中簽
晨粧露彩髻邊雲，玉佩珠顏錦似銀；
色則是空空是色，觀音曾勸世間人。

2014 4中簽
福無私與皆天賜，禍不空生自有招；
一片婆心能積善；自然福長禍潛消。

2013 95下簽
駟馬高車出遠途，今朝赤腳返回廬；
莫非不第人還井，亦似經營乏本歸。

2012 29中簽
何為邪鬼何為神，神鬼如何兩不分；
但管拒邪修正處，何愁天地不知聞。

2011 11中簽
威人威威不是威，只當著力有箴規；
白登曾起高皇閣，終被張良守舊圍。

2010 53中簽
睽別家園歲月多，不知家內若如何；
昨宵一夢真端的，今日人傳信不訛。

2009 23下簽
君不須防人不肖，眼前鬼卒皆為妖；
秦王徒把長城築，禍去禍來因自招。

2008 60上簽
賢路晴明此日開，三千才子赴京臺；
人逢亨通知如意，金榜標名萬古傳。

2007 36中簽
問君曾見舊時無，一醉昏迷誰為扶；
正是今朝新樣出，無錢空手又來沽。

2006 75上簽
肆業求謀各有方，朝為田舍暮為皇；
田可耕時書可讀，自然利亨有名揚。

2005 13中簽
持齋受戒須精致，盛積爐煙荐聖賢；
香火滿堂皆顯應，何勞經卷往西天。

2004 76中簽
人情反覆似波濤，勿謂金蘭結義高；
上古守明不重利，囊空不見舊同袍。

2003 83下簽
掛帆順水上楊州，半途頗耐浪打頭；
實力撐持難寸進，划槳下帆舟難走。

2002 38中簽
人扳高處求真菜，我向低邊拾芥羌；
媚奧不如去媚灶，莫教步獵逞英豪。

2001 30上簽
魂逍魄爽氣為真，身似如來妙色身；
天眼恢恢臨坐下，不虧積善有功人。

2000 71中簽
龍吟溪外水自甘，虎笑崗中去復還；
境傑風雲能際會，地靈潮障兩相參。

行馬騮山

今日大年初一，在屋企冇嘢做，所以搭車去金山郊野公園睇馬騮，今日行到山上，咁啱見到有喂飼員喂金山馬騮，有幾隻仲有「花名」，例如「爛面」（因為同其他獼猴打到爛面）、蟹鉗（手腳似蟹鉗）等等，而且每隻馬騮對食都好有要求，例如有啲剩係食甜包，鹹包直情唔接，但花生係所有馬騮至愛，有花生拋下就必搶。



行金山郊野公園，一般都是在幾個水塘行一圈，不過今次行程比較特別，直接行完整條金山路，經過小路，經淳風仙觀到石籬天主教小學，乘搭巴士離開。