天氣預告

手機可以睇天氣並不出奇，但最奇怪的是預報的天氣通常都不準確，今朝去街市食早餐，睇睇最新天氣，發覺 HTC 的天氣報告話深圳有雪，唔係卦？我未聽過深圳落雪喎。

兩次維修

相信好多人都知，小弟有把梁蘇記雨遮，都用了兩年幾，期間整了兩次，兩次都係整中間支主骨，都係開得唔係太順暢所以去維修，第一次就咁鉗實佢，10 分鐘整完，今次就要放在店舖一星期，星期日趁得閒去拎，發覺今次成支主骨換了，其他部分沒有換。由於落雨，即時使用，主骨伸縮算是暢順，話明遮骨永久保用，所以整了兩次都冇收錢。不過咁，我嫌支遮太細，所以整遮當天買多一支 24 吋縮骨遮，稍後時間畀大家睇睇。

密封車尾

九巴在 2012 年將會「全冷」，即是所有非空調巴士（熱狗）如無意外將會在今年退役，所以大家會發現好多人拎著部相機影熱狗，我都唔執輸，得閒影一、兩幅留念。早前就影了一張 11K 巴士，呢架係丹尼士巨龍 Dennis Dragon 11 米，巨龍都有好多款，所以有些款式會有花名，例如呢款龍就叫做密龍，因為車尾係密封，可以安裝冷氣系統，但最後都冇裝到，結果變了熱狗，直到除牌都冇轉回冷氣巴。

雖然熱狗愈來愈少，不過我朝早搭車好多時搭熱狗，仲要係密龍，因為我搭 5A ，同一班車通常係密龍。

最多最大

今日本來放假，但因為有要事在身，要返公司工作半天，下午與友人去九龍城食飯，由於小弟有一部相機隨身，於是拍下「最多站位的巴士分站」（分站名稱為「富豪東方酒店」）以及在九龍灣 PIAGO （咪又係 UNY ，呵呵）購買，小弟見過最大支的墨水（有 350mL ）。



講起這個最長的巴士分站，基本上由我出世到現在，個站都一樣咁長，只不過近年好似縮短了，可能因為站位重組吧，但停此分站的巴士線有 42 條之多，並分為 10 組排列，站中間有一張指示，列出巴士線與經過位置，張紙有 1 米長，認真誇張。



至於那瓶 350mL 墨水，係日本 Pilot 出品，究竟可以用幾耐？我唔知道，不過我畀條數畀大家計計。一瓶 Parker Quink 重 2oz ，大約 59mL ，而小弟大約每兩年用一瓶 Parker 墨水，依家用緊一瓶 Cross 墨水，係由 Parker 與 Cross 兩溝（因為 Cross 墨水太淺色），已經用了四分一，咁大家自己計計呢一瓶墨水我可以用幾耐。

兩條領帶

印象中帶過 4 條領帶，小學、中學、大學各一條，還有一條「飛機」領帶。最近著過一次西裝，發覺著落唔錯，所以下個月再著多一次，經過馬莎，買了兩條領帶，唔知到時我會帶邊條？到時大家便會知道。

現場錄影

話說小弟有追看《亞洲星光大道 3 》，上星期日已經是小弟第 3 次上亞視看錄影，有人問我點解去看錄影，一來看現場好過看電視，而且小弟認識大量 Fans Club 成員，去到亞視門口就有飛入場，而小弟去看錄影的唯一工作亦很簡單，就是拍攝相片。

在錄影廠拍攝與一般室內環境不同的地方，是現場為攝影機拍攝而噴出大量白煙，加強拍攝不同顏色光束的效果，其次是環境光線偏黃，又不能用閃燈，如果以全自動方式拍攝，最後就要逐張執，相當麻煩。小弟一向都很懶，很怕執相，遇著錄影廠的環境，首先在相機上自訂拍攝風格，將反差與銳利度設定為最高，同時增加飽和度，在拍攝時使用不同的白平衡，最後就是要影得夠多， 6 小時的錄影，小弟拍攝了 1,500 張相片，但實際可用的只有 300 張左右，但保證每張相有一定質素。

改變命運

這個 Blog 幾乎已經荒廢，因為近年的生活瑣碎事都沒有興趣與其他人分享。不過，這個 Blog 有時候也可以作為一個記錄，方便日後查證。話說昨晚連續幾個夢，至於發了甚麼夢，小弟沒有刻意去記，皆因記夢是需要花精神，但其中一個夢的情景實在印象深刻，就是手機連槍袋掉進馬桶內，最神奇是小弟竟然情不自禁下開機，看到手機顯示白色畫面加一個標誌後便自動關閉了。現在小弟使用的是 HTC Touch Diamond ，開機是黑底加 HTC 標誌，掉下的手機可能是另一部，所以便「立此存照」，讓自己在日後作為參考。

另外，今朝起床做了一件事，就是將槍袋的擺放位置由右邊更換至左邊，因為夢中的槍袋位置是右邊腰側，改變擺放位置，或許可變變命運！

３Ｄ眼鏡

「睇 3D 戲要自購眼鏡」聽起來好似好環保，但當有報紙報導在稍後時間要自購 3D 眼鏡入場時，每副眼鏡都只是 $6 ，筆者真的很懷疑有多少人會自備眼鏡睇 3D 片，因為 $6 價錢實在太便宜了，買了一副入場看，幾個月後心血來潮再看 3D 電影，又未必價記得帶 3D 眼鏡，但因為價錢便宜，買飛時又會買一副，結果家中可能會有一堆 3D 眼鏡。現時參與的戲院包括百老匯、 UA 、 AMC 與 Palace ，因為這幾條院線都是用 RealD 3D 眼鏡。假如每一間戲院都要自備眼鏡，隨時要戴 3 副 3D 眼鏡出街，因為有時未必知道自己去哪間戲院睇戲！