【上文提要】東京遊記 2026 ─ DAY 1：隅田川花火大会
煙花可欣賞到晚上 8 點半，但最後拍人多，所以提早 8 點離開，由於淺草站已塞滿人，友人與我於是沿東京地鐵銀座線離開，搭銀座線也要留意出入口是否對應行車方向，入閘之後不能在閘內過對面月台，難怪在出口有警察用手勢叫其他人去對面路馬路。
去到池袋附近搵地方食晚餐，發現酒店附近有一間「牛兵衛 草庵 池袋西口店」，於是問問有冇位，確定有位直接入去，去到燒肉店已經晚上 9 點半，店舖職員提示店舖 10 點 last order，11 點關門。我覺得在個半鐘食燒肉完全冇問題，因為本人是 BBQ 大師，一人可燒二人燒肉，技巧十分純熟。
店舖以 iPad 落單，有中英文菜單，只是譯得不好，當然，點餐只要看圖便可。最後友人點了雅（Miyabi）餐，每人消費 8,800 円（連稅），據介紹是需要買整隻牛的店舖才可以製作這個套餐，有冇咁誇張？套餐包括 14 道菜，包括前菜套餐、和牛 aburi 壽司、丹鹽 + 六道推薦和牛精選、烤海鮮、自選餐點和甜點。
和牛壽司上的牛肉是輕輕一炙，基本是生牛肉，只要有勇氣一試，真係一試難忘，完全冇生牛肉的血腥味，但新鮮味道更突出。另外，和牛燒熟之後依然入口即溶，口感極好，前菜也十分好味，最意想不到的，是最後的甜品是杏仁奶凍，直情是凍的杏仁霜，未食有一陣杏仁味，只要能頂得住這氣味，這個甜品十分吸引。
燒肉店晚上進餐人士不多，雖然如此，上菜速度較慢，前菜與主菜在 15 分鐘後送到，最後一道燒肉要等多 30 分鐘（晚上 10:20）才送到，還以為燒肉店漏了單，又說店舖 11 點關門，應該早點放上枱吧，幸好本人燒肉速度快，20 分鐘已燒完所有肉食了。
店舖網址：
https://gyubei-souan-ikebukuro-west.com/
【下一篇】東京遊記 2026 ─ DAY 2：Moomin Valley Park
沒有留言:
發佈留言