每人五百

早前收到舊同學的「紅色炸彈」，老實說，同學結婚，俾 $500 有乜所謂？但係唔知點解，好多同學都係以聚舊為名，實際上係派帖俾小弟。講真，其實好多人都知我逢帖必收（除非我唔識啦），除非嗰日唔得閒，唔係一定出席，所以唔使用「聚舊」來做藉口，直接問我嚟唔嚟好過啦，我記得有一個舊同學，佢連帖都冇俾我，剩係問我嚟唔嚟，我都應承啦，唔使咁怕醜喎。之前睇到舊同事 Tuss 嘅 Blog 上面有一篇叫「分享的快樂」嘅文章，忽然諗起許冠傑嘅其中一首歌《鬼馬大家樂》，當中包括一段叫〈點解要擺酒〉，我諗，依家啲人擺酒唔使攪到搵人「度水」，反而買樓就真係投晒降，呵呵！

點解要擺酒　亂咁嘥錢冇理由
人人為飲一杯酒　累到夫妻一世憂
點解要擺酒　恨我整濕咗個頭
求人度水搵幫手　月尾薪金起勢扣
揸杯酒共渡患難　通枱走做阿茂
實係日後我與妳　做到獅子咁嘅口
點解要擺酒　望見張單報晒仇
難為自己一雙手　預算開支點會夠