《芙莉歐莎：末日先鋒傳說》短評

上一套 Mad Max 系列已經係九年前，雖然已不太記得電影細節，但中間由 Mad Max 揸車離開山谷到擺脫不死 Joe 一段，絕對是試多聲道的必試片段，我在舊公司出咗一個 Facebook 詳述箇中原因，有時間可以 click 入下面條連結。

《末日先鋒：戰甲飛車》：出色的音效設計　但未必個個識得聽

去到今集《芙莉歐莎：末日先鋒傳說》，聲音效果依然強勁。不過今次我去咗尖沙咀 iSquare 睇 IMAX 版，IMAX 戲院在聲音上的特色是輸出音壓特別大，缺點是聲音的細節部分很弱，當有很多架電單車怒踩引擎，中低頻強勁，但減弱了配樂中的細節部分，要聽真聲音效果，最好去靚聲戲院睇 Dolby Atmos 版本。至於畫面，則較上一集更加乾淨，雜訊更少，在室內環境色彩更豐富，光暗反差更明顯，遠遠超越上一集。

講到劇情，就算冇睇過上一集《末日先鋒：戰甲飛車》亦問題不大，因為呢一隻係前傳，即係補充上一集沒有詳細講解的事，包括女主角芙莉歐莎的前半生，又為何做不死 Joe 集團的主力車手？雖然今集不死 Joe 也有出場，但主要反派「雷神」Chris Hemsworth 出場較多，只係因為我對雷神印象太深，覺得佢演得唔夠奸。

有人說今集較上集遜色，如果講鬥車場面，我認為各有特色，上一集主要係鬥車畫面同勁爆聲效，故事交代上著墨不多：而今集既有鬥車，聲效亦很強勁，但文戲亦不少，今集的片長亦較上集長了半個鐘，令不少人覺得故事拖得較長。可能導演 George Miller 都覺得故事長，《芙莉歐莎：末日先鋒傳說》的故事分成五節。其實分五節效用不大，因為在戲院也是一次過看完，反而在家中看串流的效用較大。

總括來說，《末日先鋒》係一套好個人風格的電影，鍾意 George Miller 或者 Mad Max 系列的觀眾，今集不會令你失望。如果從來冇睇過任何一套 Mad Max 系列電影，又唔知邊個係 George Miller，最好看一看今集 Trailer，如果睇完 Trailer 後對《芙莉歐莎：末日先鋒傳說》沒有興趣，就不要入戲院看了，看完之後好大機會出負評。

《查無此人》短評

呢套係孫立基响疫情期間拍攝的電影，想當年在 3D 流行的時候曾經訪問過佢，最近忽然有套關於網絡詐騙的電影《查無此人》上畫，老老實實，我真係好驚上畫幾日就開始 cut 場，所以趁有時間，今朝去 K11 睇早場，最後發現，原來《查無此人》比想象中好睇，值得入場支持。

睇電影 poster，大概知道由余凱祺飾演的女主角疑似殺死黎紀君飾演的角色，然後疑似交換身份，而電影開始的頭幾分鐘，就已經隱隱揭露兩者已交換身份，電影是發生於由一個大單位間開的多間套房開始。除咗身份交換，電影亦提及金融詐騙、身份轉售等，內容豐富亦不難明白，電影內亦會簡單交代。

通常呢種類似懸疑片，到最後都是草草收尾，解釋牽強，但《查無此人》最終結局算是完整，女主角下場幾慘。雖然有人話冇交代神婆同網絡 KOL 下場，但正如電影中的 Ray 話齋，要做，就要做到底，話唔定其他人一樣，都會被消失，或者被利用洗白。

要睇電影劇透，可以去【Yahoo送戲飛】全港首部身份盜竊犯罪片！《查無此人》改編真實詐騙個案睇睇。

《九龍城寨之圍城》短評

電影由試映以來，幾乎全面好評，有冇咁好睇呀？今朝見戲院有位睇早場 Dolby Atmos 版，$60 睇足兩個鐘係好爽嘅。大部分時間都係打交，電影裡面好多人本身都唔係習武之人，咁長嘅打片應該拍咗好耐。雖然有啲動作看起來有啲突兀（例如林峯飛上一層而唔係跳上一層），但整體打鬥場面相當精彩，場景設計、聲效效果就不需多講了，基本上有讚冇彈。如果吹毛求疵，都不外乎缺乏女角、文戲太少而已。

再看《但願人長久》

【有劇透】對我來講，用畫面說故事的電影好易睇漏嘢，第一次睇《但願人長久》的時候，睇漏眼有啲嘢唔明，又冇人提過，唯有入場再看多次，最後發現林覺民（吳慷仁 飾）最後都係吸毒死。

點解係吸毒死？有留意林覺民在屋內的最後一個畫面，是在枕頭內找一些東西，還記得 07 年子圓（謝咏欣 飾）在父親的枕頭內找甚麼，然後扔到洗手盆嗎？是白粉！所以我估計林覺民最後都是戒不掉毒癮，在家中食白粉後死亡。第一次睇呢套戲，還以為林覺民在湖南死去，但當留意到林覺民這個小動作，加上由 17 年子缺（袁澧林 飾）通知 17 年子圓（祝紫嫣 飾）爸爸死訊。假如爸爸在湖南過身，家鄉的親戚應該會先通知子圓吧！