墨芯移植

有一次在深水埗某文具店上，有一個同學仔想買一支「墨水筆」（中港台大多數叫「鋼筆」，日本就叫做「万年筆」），店長給了一支最平的鋼筆給她，但她問鋼筆有沒有墨，店長說到，鋼筆必須另外買墨，最後這個同學仔沒有購買了。本來想同這個同學仔講：「香港大創（Daiso）有 $12 鋼筆賣，仲送一支墨芯！」不過這位同學仔，轉個頭已經離開了，唔見咗。

如果有留意我 Facebook 的朋友，都知道小弟在淘大的大創買了一支日本 Platinum Riviere 鋼筆，$12 一支（咁平因為係祖國製造）。雖然很便宜，但寫起來都十分暢順，所以一直放在工具袋內備用。另外，早年有一位朋友在日本買了一支 2,000 円的 Platinum 鋼筆（型號不詳），最近因為吸墨器漏墨，已很少用。

前兩天，小弟忽發奇想，既然兩支都是 Platinum 鋼筆，兩支鋼筆的墨芯應該可以交換吧，所以嘗試將 Riviere 的墨芯換到 2,000 円 Platinum 鋼筆上，倒轉放半天，結果成功引墨上咀，寫了過千字也沒有斷墨，十分不錯。由放那支 2,000 円 Platinum 鋼筆採用「中細」筆咀，寫幼字十分細緻，用來寫信就十分合適，而這支 2,000 円 Platinum 鋼筆將取代 Riviere，放在小弟的工具袋內備用。

日本刺身

晚市禁堂食，想出街食一餐好嘅，唯有中午食，今日星期日同友人去咗九龍城山葵日本料理食咗一碟刺身同半碟海膽，發覺唔多夠飽，再食多一個海鮮烏冬，十分滿足。

去珀麗灣

今日去珀麗灣做嘢，本來諗住去中環 2 號碼頭搭渡輪去珀麗灣碼頭，去到碼頭剛好 17:31，走失了一班，諗住等 18:00 那一班，但等等吓有點奇怪，去到 17:58 都冇人等船。跟住望一望航班表，發現星期六是一小時一班，由於趕著去工作，唯有離開立刻用 HKTaxi App call 的士去珀麗灣，連西隧隧道費合共 $260。雖然堅貴，但到珀麗灣剛好 18:30，20 分鐘多少少，與乘搭渡輸的時間差不多，呢一程車錢真係值得畀。

由珀麗灣返屋企，當然用最便宜的方法，就是乘搭 NR332 巴士去葵芳站，再乘九巴 40/290/290A/290X 去黃大仙，最後轉 61X 去九龍城碼頭，全程需 1.5 小時。

經典升降機

 

今日去灣仔富士屋工作，乘搭了一架很舊的意大利 Sabiem 升降機。其實富士屋都唔係第一次嚟，但今次忍唔住手影一張升降機的內部相片。點解小弟無端端講呢部升降機？原因係小弟的土瓜灣舊居，升降機牌子正是意大利 Sabiem，印象中的內部裝潢與今時今日在富士屋拍攝的相片十分相似，實在令小弟懷念小時候的生活點滴。

純解碼器

詳文：【評測】iFi ZEN One Signature：LDAC、aptX HD、MQA 通殺　純數碼結合藍牙接收

一向以來，iFi 以推出小型音響產品為主，好似早前為大家測試過的 ZEN Stream 及 ZEN DAC V2 都是機身小巧兼有型的音響產品，最重要是售價親民，可因應個人需要配搭不同型號。iFi 最新就推出 ZEN One Signature，內置藍牙接收功能，支援 aptX HD、LDAC、LHDC 等最高編碼規格，為聲音系統提供純聲音解碼選擇。

頭痛救星

昨晚瞓得唔好，今日起身好頭痛，本來今朝想寫稿，結果痛到寫唔落手，結果再瞓，但痛到瞓唔著，唯有搽白花油响額頭，以「乸」攻痛，可頂大約一小時，所以今日就搽了三次，瞓到下午四點，最後今日沒有工作，起身只是寫稿，寫完之後再寫這篇網誌，記下今日頭痛一事。

一體播放

詳文：【評測】NuPrime Omnia A300：一機兼備全功能串流、解碼連放大

NuPrime Omnia A300 旗下首款集串流播放、數碼輸入、解碼、耳擴、數碼合併放大於一身的一體式播放器，而且其機身體積僅 280 × 55 × 250 毫米，在細小的家居環境增添一部全功能播放器是最佳的選擇之一。

麗斯戲院

今日經過黃大仙中心正德街 20M 小巴站，忽然仔細望望站頭的小巴站牌，發現站牌上寫上「麗斯戲院」，起初還以為是越秀廣場前身，但站牌上同時包括越秀廣場，再想一想，越秀廣場的前身應是曾經是全港最大戲院「麗宮戲院」。小弟的印象，「麗斯戲院」應該在旺角，在新蒲崗的麗斯戲院又在哪裡？

在網上找尋相關資料，原來新蒲崗麗斯戲院前身是「英華戲院」，英華戲院於 1967 年開幕，共有 1,454 個座位，院主叫盧林，當年他同時經營英京、榮華、寶華等戲院。大約在八十年代尾九十年代初，英華改名為麗斯戲院，2005 年戲院結業，現在變成安老院。

亦即是說，小巴站站牌至少有 16 年歷史！

相關資料：衍慶街：電影、美食與故事

黑客攻擊

今個月初，小弟發現有黑客不斷攻擊本人的 Facebook 戶口，由於小弟的 Facebook 戶口使用雙重驗證，黑客未能即時登入。根據本人經驗，這批黑客與上次攻擊 Google 戶口一樣，都係國家級層次，小弟真係怕怕，加上冇心情處理 Facebook 戶口安全，所以暫時關閉 Facebook 戶口，等待小弟有心情才重啟戶口處理保安事宜。

電氣化火車

「電氣化火車，返工返學要靠佢～」，唔知大家有冇聽過呢首廣告歌？以前覺得火車好快，但唔知乜嘢原因，車速近年好似慢咗，我查過維基百科，東鐵綫最高時速是 120km/h ，但今日搭 277E 由上水出沙田（去到大老山隧道過對面馬路轉車），途中咁啱見到一架韓製列車經過，所以用電話拍低。巴士最高時速 70km/h，畀盡佢都係 80km/h，但竟然與東鐵綫列車並排行，證明我個感覺冇錯，火車真係慢咗。至於點解，我冇研究，反正我由上水去沙田都係搭巴士而唔搭東鐵綫。

青馬大橋

好耐冇搭巴士經過青馬大橋了，小弟乘搭經過青馬大橋的巴士，不是去機場，就是去東涌。不過，今日是經東涌搭 DB01R 去愉景灣。其實由香港島去愉景灣都幾貴，港島搭 E11 去東涌要 $21，東涌去愉景灣搭 DB01R 要 $12，合共 $33，來回合共 $66。乘搭巴士似乎很貴，但乘搭愉景灣渡輸更貴，單程便要 $46 了，我相信也沒有機會乘搭渡輪了。

荃灣西約

講到荃灣西，大家相信會想到荃灣西站一帶，其實真正的荃灣西在「荃灣西約」，即是灣景花園、麗城花園、東南工業大廈、江南工業大廈一帶的位置，以前要去這個地方，必須在荃灣市中心乘搭小巴，或者轉乘經過青山公路荃灣段的巴士。近年，九巴在上下班時間開設西隧過海線，除了早前乘搭過的 936 外，亦開設往返荃灣西約的 934 。

這條線由灣仔菲林明道開出，本身是一個巴士分站，沒有站頭，可說是以特別班次開出，由灣仔到麗城花園，只需 35 至 40 分鐘，真係話咁快就到。不過，夜晚由麗城花園返灣仔就沒有班次了，要乘搭巴士到沙咀道轉乘城巴 930X ，時間長一點，亦要行駛至荃灣工業中心才直上高速往西隧。

交通津貼

今日可以取得 2021 年 12 月的交通津貼了，小弟是買九巴月票搭九巴的，九巴月票有效期 30 日，而 12 月有 31 日，要攞盡交通津貼，最簡單的方法，就是分別在 12 月 1 日及 31 日分別買九巴月票（$780×2），$1,560 再加上非九巴交通費用（例如新巴、城巴、綠色小巴等），要攞盡 $500 交通津貼絕對冇問題，小弟今個月就攞盡交通津貼了。

不過，2022 年的交通津貼門檻及上限已經調整了，門檻由 $200 上調至 $400，上限由 $500 下調至 $400，下個月開始的交通津貼將相應下調。

Super Floss

早前甩咗兩隻牙，今日終於鑲咗其中一隻牙了，第一隻牙用牙橋方式裝上，假牙與牙肉中間需要用較闊的牙線清潔，所以小弟買了一盒 Super Floss，每條牙線有三節，分別是硬線、棉線和普通牙線，首先用硬線穿過假牙與牙肉之間的位置，然後再用棉線部分，普通牙線則清潔普通牙齒與假牙之間的位置，今晚試用一下，看看效果如何。

以下是一條示範片段：

打磚坪街

今日由土瓜灣去葵涌打磚坪街，本來諗住搭 6C 去深水埗轉 31B，但去到巴士站剛剛見到 6C 走咗，開九巴 app，發現 12A 就到，於是到對面馬路上 12A，在海壇街轉 31B，因為 12A 上午去深水埗隨時快過 6C，所以整體時間仲快咗。

去完打磚坪街攞嘢，回程返灣仔，12:15 見到 936 在中午 12 點尾班車，本來諗住追唔到，點知原來由總站去到打磚坪街差不多用了半小時，但由打磚坪街去到中環都不需半小時！唔怪得 936 係「載空國際」嘅皇牌線，上車的人少，我有點懷疑車上所有人的車費都只能付西隧隧道費！

停用 Facebook

當大家看到這篇文章的時候，小弟的 Facebook 已經關閉了兩天。

由於小弟發現有黑客嘗試攻擊本人的 Facebook 賬戶，雖然賬戶有兩步驟驗證，但為安全起見，即時停用 Facebook 戶口，但 Facebook Messenger 仍可找到小弟，見到這篇文，不妨到 Facebook Messenger 和我說一聲「Hi」。

在 Facebook 上加了 3,000 個朋友，但真正的朋友不多，本來沒有預計有人會發現小弟停用 Facebook 賬戶。不過，昨晚有一個來自加拿大的網友，從「香港網台」App 認識他，他在 Facebook Messenger 打一個「Ping」字。他果然是一個 IT 人，小弟也估不到他會用「Ping」來找我。