2011年2月24日星期四

新刀體驗


由細到大都係用剃刀,因為以前用「超凡」( Schick Ultra )剃刀唔貴,後來見到 Gillette 推出震動剃刀 M3 Power ,手痕買了。用了一段時間,又見到 Schick 推出 Quattro Energy 「創 4 紀鋒動」,之後再轉用 Schick ,近年配合 Quattro 4 Titanium 4+1 刀片,好胋面,但刀片後的造型刀,令鬚根沒有位置走動,所以鬚太長、不用剃鬚膏者不宜使用。


早幾天,見到 Gillette Fusion 體驗版(包括 Gillette Fusion 、 Fusion HydraGel 與 Fusion HydraSoothe Shaving Balm )賣 $69.8 ,本來對水潑式移動的 Fusion 刀頭沒有興趣(而且刀片實在太貴),不過想試試技補濕,但又唔想買咁大支,所以索性買個體驗版試試,感覺不錯,尤其是在乾燥天氣,對皮膚更好保護。不過小弟多汗,夏天似乎不太適用,所以將來都不會買 Shaving Balm 。反而 HydraGel 在早年曾經用過,剃鬚特別暢順,近年愈來愈難買到平價的 NIVEA 剃鬚膏,價錢與 Fusion HydraGel 差不多,所以用埋支 NIVEA 以及在 Apita 買的 KAI 剃鬚膏之後,好大機會轉用 Fusion HydraGel 。

2011年2月22日星期二

迷彩雨傘


在 2008 年 6 月,小弟買了一把梁蘇記( Leung So Kee )縮骨遮(詳請可按此),曾經在八號風球下試用,結果主骨歪了,維修之後,感覺上依然有少少內傷,事隔兩年再修理,結果換了整條主骨,雨遮開關順暢不少。不過,在修理同時,小弟亦買了一把新遮,原因不是貪新忘舊,而是舊遮只得 21 吋,太細,所以買了一把 24 吋遮。遮骨比舊遮更粗,十分堅固,遮布則採用迷彩面加銀底,其實本來想選擇藍面加銀底遮布(這個組合的防晒度最好),但舖內只有黑面黑底,太吸熱,店舖負責人話要訂造,售價一樣( $358 ),但要等,她建議可以做迷彩面加銀底,因為有訂單做這款遮布,一個星期完成,最後退而求其次,選擇這款遮布,呵呵。

2011年2月21日星期一

睇演唱會


老老實實,小弟好少真金白銀買飛入場睇演唱會,一來我好怕熒光棒在我眼前搖動,睇演唱會,隻眼會痛,就算有免費飛我多數唔去,二來唔多鍾意聽歌,或者話,對好多歌手的演繹冇乜感覺。不過,尋晚亢帥克與香港業餘管弦樂團、 The3Think 的《星光演奏廳》,小弟罕有地買飛入場睇。演唱會在上環文娛中心劇院舉行,座位 480 ,雖然較細,但入場看的人士,都是盡情投入。


演唱會以香港業餘管弦樂團作序幕,之後有 The3Think 的電子音樂,亢帥克演唱多首在《亞洲星光大道》所演唱的歌曲,再有 The3Think 樂隊演唱 4 首歌曲,還有星光家族李雯珊、古卓文客串演出,最興奮的是李家仁醫生在香港業餘管弦樂團演奏下演唱〈小明上廣州〉原版與清唱英文版的上半段(所以在台上台下個個都叫李醫生做小明,呵呵),演唱會時間不長,約兩個半小時,最估唔到的開始時間頗準時,只是遲了 10 分鐘,香港業餘管弦樂團演奏時間禁止遲到人士入場,絕對要讚,不過場中竟然有兩個人用閃燈拍照,可惡!

2011年2月19日星期六

尋找古蹟


有香港找古蹟唔係咁容易,有時真係遠在天邊近在眼前,好似位於域多利皇后街與皇后大道中交界的位置,原來是 1841 年 6 月 14 日,首次官地拍賣會中賣出的第一幅土地的一部分,到底有甚麼途徑可看到這些遺址的資料?

2011年2月14日星期一

天氣預告


手機可以睇天氣並不出奇,但最奇怪的是預報的天氣通常都不準確,今朝去街市食早餐,睇睇最新天氣,發覺 HTC 的天氣報告話深圳有雪,唔係卦?我未聽過深圳落雪喎。

兩次維修


相信好多人都知,小弟有把梁蘇記雨遮,都用了兩年幾,期間整了兩次,兩次都係整中間支主骨,都係開得唔係太順暢所以去維修,第一次就咁鉗實佢,10 分鐘整完,今次就要放在店舖一星期,星期日趁得閒去拎,發覺今次成支主骨換了,其他部分沒有換。由於落雨,即時使用,主骨伸縮算是暢順,話明遮骨永久保用,所以整了兩次都冇收錢。不過咁,我嫌支遮太細,所以整遮當天買多一支 24 吋縮骨遮,稍後時間畀大家睇睇。

2011年2月10日星期四

密封車尾


九巴在 2012 年將會「全冷」,即是所有非空調巴士(熱狗)如無意外將會在今年退役,所以大家會發現好多人拎著部相機影熱狗,我都唔執輸,得閒影一、兩幅留念。早前就影了一張 11K 巴士,呢架係丹尼士巨龍 Dennis Dragon 11 米,巨龍都有好多款,所以有些款式會有花名,例如呢款龍就叫做密龍,因為車尾係密封,可以安裝冷氣系統,但最後都冇裝到,結果變了熱狗,直到除牌都冇轉回冷氣巴。

雖然熱狗愈來愈少,不過我朝早搭車好多時搭熱狗,仲要係密龍,因為我搭 5A ,同一班車通常係密龍。

2011年2月7日星期一

最多最大

今日本來放假,但因為有要事在身,要返公司工作半天,下午與友人去九龍城食飯,由於小弟有一部相機隨身,於是拍下「最多站位的巴士分站」(分站名稱為「富豪東方酒店」)以及在九龍灣 PIAGO (咪又係 UNY ,呵呵)購買,小弟見過最大支的墨水(有 350mL )。



講起這個最長的巴士分站,基本上由我出世到現在,個站都一樣咁長,只不過近年好似縮短了,可能因為站位重組吧,但停此分站的巴士線有 42 條之多,並分為 10 組排列,站中間有一張指示,列出巴士線與經過位置,張紙有 1 米長,認真誇張。



至於那瓶 350mL 墨水,係日本 Pilot 出品,究竟可以用幾耐?我唔知道,不過我畀條數畀大家計計。一瓶 Parker Quink 重 2oz ,大約 59mL ,而小弟大約每兩年用一瓶 Parker 墨水,依家用緊一瓶 Cross 墨水,係由 Parker 與 Cross 兩溝(因為 Cross 墨水太淺色),已經用了四分一,咁大家自己計計呢一瓶墨水我可以用幾耐。

2011年2月4日星期五

兔年靈簽

很久都沒有更新這個網誌,冇計,因為沒有甚麼事想與大家分享,想分享的都放在《 AV Magazine 》的編者話內,要看,就每星期買一本《 AV Magazine 》,看看〈編者話〉吧!

鄉議局主席劉皇發在車公廟為香港求得 11 號中籤,籤文是:

十一簽.中簽

    威人威威不是威,只當著力有箴規;
    白登曾起高皇閣,終被張良守舊圍。
解曰:凡事守舊.求財遂意.自身得運.婚姻不合.
斷曰:家宅門面風光.占病似好非好.自身循規蹈矩.出入平平.婚姻且慢.求財無.

   恃勢凌人.缺德不改.其所擁有.必被取代.

自身:要謹慎  財運:可得小利 訴訟:不宜魯莽
行人:仍未動身 生育:要產後調理出行:不宜遠行
事業:獨資較佳 姻緣:時機未到 家宅:家宅平安
搬遷:不宜   疾病:小心突發性疾病