2011年12月26日星期一

強化玻璃

有留意 Galaxy Nexus 的人都知道,部機唔係用康寧 Gorilla 玻璃,只知道係強化玻璃(fortified glass),但我用呢部機係唔貼保護貼,因為保護貼會影響觸控感覺,而且會愈用愈花。最重要係我冇諗住放機,上一部手機都畀我用到傷痕纍纍。今日無聊睇 YouTube ,發覺原來 Galaxy Nexus 個畫面都好硬,詳情可看以下片段。

2011年12月25日星期日

智能手機


除了小弟之外,最近身邊有不少人都購買新手機,而且都是用 Android 系統,其中一個例子,當中包括 Sony Ericsson Xperia Ray 與 Samsung Galaxy W ,貪佢夠細部,而且價錢 2,000 幾蚊,對於打電話多過上網的人來說,呢個價錢其實又型又抵買。不過早前曾經試過將 Galaxy W 直駁電腦,卻不能接通,去 Samsung 官網查看,發覺原來要安裝 Samsung Kies 工具程式,但下載/安裝之後,又可以唔經 Kies ,以 MTP(Media Transfer Protocol)直接抄檔案入 Galaxy W 內。當然,有些功能是 MTP 做不到,例如管理聯絡人與 Podcast 頻道。

另外,我試過將 Galaxy Nexus 連接電腦,睇睇 Kies 認唔認到部 Google 親生仔,結果係 ── 個軟件當 Galaxy Nexus 冇到。

2011年12月22日星期四

換新手機

小弟部舊手機都用了 3 年有多,對於很多人來說,一年隨時換幾部電話,但小弟用機的要求不高,能夠打電話、打 SMS 、間中上網找資料便可,所以 HTC Touch Diamond 用了 3 年多,也不覺得有問題,只是電話速度太慢,上網限制太多,而且顯示屏尺寸細,又只是 4:3 比例,開鍵盤打字,畫面遮去大半,加上 Marketplace 已不支援 Windows Mobile 6.1 ,換機似乎成為必做的事。今年開始已經考慮了不少品牌的機種,包括 Motorola 、 HTC 、 Sony Ericsson 等等,最後得悉 Google 親生仔 Galaxy Nexus 在 12 月中推出,定價 $5,398 ,之後去數碼通訂機,售價比想像中便宜, $5,000 唔使仲可以唔簽約。不過部機被數碼通改裝,用了 SmarTone 首頁,小弟稍後時間將會剷走所有多餘 Apps ,回復手機的真身。

2011年12月19日星期一

網頁廣告


話說早前在馬場拍了一條片,放了幾天,已經收到 YouTube 電郵通知,影片中可能包含 EMI Music Publishing 所擁有或授權的內容。影片可以照放,但頁面右側多了一個廣告。最近各大 Google 服務頁面,都會顯示 Galaxy Nexus 廣告,但剛剛發現,原來個廣告串錯字,呵呵。

2011年12月15日星期四

沙田馬場


上個星期六有月蝕,當天天氣十分不俗,絕對能夠以「萬里無雲」來形容,加上空氣質素高,不看月蝕真係對唔住自己。到土瓜灣海邊看月蝕,眼看不少人拿著相機拍攝,有人問我,為甚麼不去拍攝?小弟心想,月蝕相片都是黑底加一個月亮,又不是要考驗自己的拍攝功力,拍攝相片有點阻礙欣賞月蝕的興致。反而在星期日的國泰航空香港國際賽事 2011 ( CXHKIR 2011 ),自己又不賭馬,所以拿起相機拍攝其中 4 場國際一級大賽,當中最後一場國際賽「國泰航空香港盃」,真的十分精彩,香港代表「加州萬里」最後跑出贏第一,而且當日更有超過 60,000 人入場,場面墟冚。

相集網址:http://www.pbase.com/lamkiuwai/20111211_cxhkir

完場之後更有煙火表演,同樣精彩!

古老剃刀

早前買了一支 $15 舊款剃刀,用了一個星期, Gillette Super Blue Blade 確實很貼面,但有些轉彎位,尤其是下顎位特別難剃,整體來說,都係用返原有的 Schick Quattro 4 Titanium 比較好。不過,正所謂「用得唔好蹝」,所以我會繼續用呢支舊剃刀。講起呢支平價剃刀,結構簡單,但安裝時要拆件,以下為大家介紹一下。

剃刀分為四個部分


Gillette Super Blue Blade 是上海刀片生產


手柄將其餘兩個部分連接,中間夾著一塊刀片


夾實之後,刀片呈彎曲形狀

2011年12月4日星期日

上海吉列

如果有看小弟的網誌,都知道小弟是使用剃刀剃鬚,用鬚刨的好處是方便,缺點是刮損表皮,面與鬚會愈剃愈粗,皮膚會愈來愈差。用剃刀就剛好相反,首先要濕剃,既要洗面,又要用剃鬚膏,剃一次最少用 5 分鐘,但由 10 幾歲用到現在,皮膚也沒有因此而變粗,而且新一代的刀片加上防刮損設計,正常使用,很難剃到流血。


其實用了那麼多年剃刀,一直都想買 Schick Injector ,因為入剃刀的方法很特別,但產品已停產多年,難於購買,反而最舊式的傳統剃刀還有很賣。話說大陸有一間叫上海吉列,是上海刀片與吉列刀片的合資公司,推出過不同類型的剃刀與刀片,當中包括上圖的 Gillette Super Blue Blades 。由於 Gillette 已被 P&G 收購,相信上海吉列已沒有這款剃刀推出,但這款剃刀依然可在舊店舖有售,今日就在九龍城買了一把,售價只是 $15 ,而刀片則是早前由友人贈送, 5 片 $10 ,今晚測試一下,看看效果如何。

2011年11月24日星期四

更換舊卡

由於小弟是乘搭巴士/小輪返工,遇著八達通冇錢,搵地方增值十分麻煩,所以在多年前就開始使用個人八達通,唔覺唔覺就用了 11 年,因為個人八達通是自動增值,這張卡絕少拿出來,保養十分好。

最近收到一個來自八達通的 SMS ,可以為小弟免費更換個人八達通,呢個世界有冇咁著數,有人會無端端會幫你主動換卡?事實上又真係咁著數,經過一輪電話溝通過程,張卡寄到我屋企,只要去票務中心,將舊卡資料移植至新卡上便可。

2011年11月1日星期二

司法覆核

最近公司有另一個部門的同事問我關於外傭居港權的睇法,我只回覆一句說話:「法律的事,法律解決」。適逢小弟應承 Facebook 朋友在這裡講述有關外傭居港權的看法,所以在這裡作簡單講解。很多人以為,今次的司法覆核是外傭爭取居港權,但事實上,外傭所爭取的,是居港權申請權利,至於是否批准居港資格,是由入境處負責,入境處能夠以不同的方式限制居港獲批數目。有人又會問,為何在回歸前沒有提出司法覆核,到回歸後才出現這個問題?這都是想當年的臨時立法會,將入境條例中的限制無居留權類別增加,就連外籍家庭傭工也不算是通常居住。以往外籍家庭傭工有權申請居港權,入境處也有權不批准,又或者以計分方式設限。香港人還怕甚麼?不如先怕內地人衝關生仔吧!

2011年9月30日星期五

我講蘋果

  1. 我係《 AV Magazine 》編輯部唯一一個未買過任何 Apple 產品的人。
  2. 最諷刺的,是小弟在讀大學時出過 User Guide 教人用 Mac 機。
  3. User Guide 主要教學生用 Mac 機進入大學網絡、睇網頁、用 FTP 、開 Terminal 等。
  4. 更奇怪的,是小弟為何有一張 Apple Club 會員卡?(有圖有真相)
  5. 讀大學時經歷過 Mac 機由 68K 過渡至 PowerPC 的日子,發覺 Apple 呢間公司係癲嘅。
  6. 更癲嘅係 Apple 由 Mac OS X 10.0( Cheetah )開始已經有 x86 版影子系統。
  7. 話唔定下一步係飛起 Intel ,用 AMD FX 處理器再玩超頻。
  8. 到時我可能考慮買第一件 Apple 產品,因為我砌機只用 AMD 處理器。

2011年9月26日星期一

廣州東站


小弟第一份工作,由於有廣州辦公室,所以經常返廣州,記得返工數天就要返廣州了,老闆還問我會否介意返大陸,其實我一點也不介意。這份工做了一年十個月,共返了 12 次廣州,話多唔多,但每次去廣州,都是乘搭直通車,一落車就「打的」(搭的士),幾乎全程「點對點」,對廣州的認識確實很少。

之後的幾份工,都很少去廣州,而自從到《AV Magazine》工作後,每年都會去兩次廣州,兩次都是參與廣州的音響展,由於經常塞車,所以索性搭地鐵往返白天鵝賓館。今年索性「即日來回」,返屋企休息,因為想輕裝上陣,減少裝備。最近有一個題目,要多去一次廣州,由於時間較鬆動,所以到廣州東站行了一個圈,發覺有一個奇怪現象,就是廣州東站裝修過後,其站名依然是使用繁體字,反而其他廣州大站(位於流花公園附近的廣州站、位於番禺的廣州南站與位於花都的廣州北站)都是用簡體字,到底為何在亞運前的大改裝時,為何沒有換上簡體站名,而保留原有的繁體站名?在 Google 上也找不到答案。

2011年9月24日星期六

兩邊睇戲

今日見 Facebook 見好多行家都去了位於 IFC 2 期的 Apple Store ,於是走去中環睇睇,點知成間舖都係人,影了幾幅相,第一時間閃,走走睇《非常小特務:決戰鎖時狂魔 4D 》。

入場的時候,每人都派了一張卡紙,看到畫面上出現的數字就輕擦咭上的相應數字,睇 3D 戲已經好麻煩,邊得閒走去刮咭,之後返到屋企刮,原來每個數字上有一種味,對應畫面上所顯示的物件。

嘩!真係好 4D 呀!╮(﹀_﹀")╭

2011年9月23日星期五

超值套餐

香港麥當勞的 20 蚊超值套餐,小弟經常食,現時人仔不斷升值,在中國食一餐都很貴,很多在大城市打工的人都是食飯盒,小弟較有錢,去麥當勞食,位於大沙頭三馬路的海印廣場,有 15 蚊人仔的超值套餐,計埋匯價都比香港抵食。

另外,最近去了幾次廣州,都發覺唔係太多人用自動售賣機買高鐵車票,小弟用落去,其實唔係太複雜,只係唔小心的話好容易買錯飛而已。

2011年9月22日星期四

烈士陵園

Martyrs' Park

今日去了廣州,經過廣州烈士陵園( Martyrs' Park ),影了一輯相,大家有興趣可以看看。

http://www.pbase.com/lamkiuwai/20110921_martyrspark

2011年9月18日星期日

蚌的啟示

小弟好鍾意聽舊歌,早前睇到一個有關蚌的 MV ,就諗起〈蚌的啟示〉,現在分享一下先。

2011年9月17日星期六

深圳短遊


今日去深圳工作,我同事話國貿有音響舖,所以由羅湖搭地鐵去國貿站,行了一個圈,唔覺有,之後再搭地鐵去華強北路的萬商電器城,地下與一樓變了國美旗艦店,三樓沒有大變化。



之後發現原來萬商電器城與龍崗綫的華新站很近,所以就搭龍崗綫,在少年宮轉龍華綫去會展中心,到中心城影相,影完就經福田口岸返香港。本來可以在落馬洲搭火車返屋企,但見時間早,所以改搭九巴 B1 線去天水圍,再搭 K65 去流浮山睇山落,真係一樂也。

2011年9月3日星期六

廣州工作



星期五朝早 6 點起身, 6:15am 出門口,其實真係好眼瞓,不過今次去廣州影展覽,真係想即日返屋企瞓覺,所以提早出門口。在深圳搭動車,由紅磡搭東鐵去深圳,大約七點幾,去到火車站買飛,八點前可以入閘上車,架動車中間停三個站, 9:05am 到廣州東站。由於最早的直通車在 7:25am 開出,直通車頭班車都要 9:20am 至到廣州東站,仲未計過關時間,所以幾年前一早已經唔搭直通車上廣州,與其要等直通車,不如留少少時間去大陸 KFC 食個有中國特色的早餐!



今次出盡九牛二虎之力,中午時間唔食飯,連做 7 小時, 5:00pm 終於完成任務,走人時去了白天鵝入面間麵包店買咗兩個包食,跟住搭地鐵,半個鐘去到廣州東站,見到勁多人排隊做安檢,睇來都好多人搭車返深圳,所以安檢完就去自動賣飛處買頭等,其實廣深綫動車頭等都係貴 20 人仔,唯一優點係車廂唔准企人,而二等車廂都隨時成條走廊都係人,最後 6:30pm 入閘上車,加埋過關搭火車,九點至返到屋企,呵呵。

2011年8月31日星期三

軍艦到港


今朝經過海港城,見到架軍艦。雖然泊在海港城,軍艦都不會太大,但軍艦甲板差不多與海運碼頭平起平坐,不知這架艦艇是甚麼名堂?

2011年8月30日星期二

小小升級


小弟用了十多年的 JVC UX-MD9000 ,小弟最近為它升級,先去雜貨舖買一排 $10 小膠腳,再到聯興買 3 呎 SUPRA Mini 1.6 鍍錫 5N 無氧銅喇叭線,折實 $32 。返到屋企,每隻喇叭貼 3 隻膠腳,然後將 3 呎線分兩條,每隻喇叭用呎半。

大家可能會問,喇叭為何會用得那麼短?因為主機與喇叭的距離很近,呎半足夠有餘,而且我一向不相信「喇叭線在特定長度才好聲」的道理,只相信「喇叭線愈短,損耗愈少」的理論,所以呎半已經畀多佢。

2011年8月29日星期一

印度電影



唔好睇少印度電影,早前有隔離位同事介紹我睇一套印度電影《 3 idiots 》,睇咗幾分鐘就畀佢吸引咗,由頭精彩到尾!呢套電影在今個星期終於在香港正式上映,香港譯名是《作死不離 3 兄弟》,在百老匯電影中心上映,未睇過印度電影的朋友,這套電影值得一看,小弟全力推薦!

誤人子弟



今晚經過九龍城廣場,見到一間學習中心,門口有一幅畫,睇到類似大笨鐘、御林軍、倫敦招牌 Routemaster 等等。不過,身邊有一位兼職女車手,一睇就發現圖中出現一個很嚴重的問題,大家可以估一估,估中冇獎。

2011年8月26日星期五

特別車站



今日搭電車,見到上車位捲布牌的位置有「路程指示牌」提示,包括布牌可顯示的車站,當中有很多目的地根本沒有總站,當中包括「中環」、「金鐘(地鐵站)」、「灣仔」、「鰂魚涌」等等(詳情可按上圖放大),其實這些位置都是緊急總站,除非有嚴重交通意外,令電車無法前行的時候,才會見到這些非一般總站,透過人手方式將電車上的電弓反轉,並手動切換換軌裝置,倒轉駛至另一方向,我就見過電車以「維多利亞公園」,有時間的話可以看看以下網址:

http://www.pbase.com/lamkiuwai/20040707

2011年8月24日星期三

好好利用



看到收購/合併的新聞,小弟已經沒有太大的感覺,這些事經常在發生,當中最高的境界,是 A 公司收購了 B 公司,但作為消費者,只看到兩間公司在市場上有激烈競爭的「假象」,例如 Sony 早於 1969 年收購 AIWA (愛華)股份,成為 AIWA 的最大股東,但又有幾多人真正了解兩間公司的微妙關係?講到 AIWA 的經典產品,除了 D9 耳機,還有使用非晶質磁頭的手提卡式錄音機,小弟也有一部 HS-JX909 ,但因為香口膠電壞了,無法再使用。反而家中有一部 JVC 舊機還在使用,這就是 UX-MD9000 微型 CD/MD 組合, MD 部分在多年前已經壞了,CD 揭蓋亦出現問題,現時多數用來聽 FM 廣播。最近家中添置 DAB+ 收音機,但喇叭實在太衰聲,所以將耳機輸出連接 UX-MD9000 的 Line-in 出聲,這部買了 10 多年的微型組合終於有新用途,希望可以多用幾年,日後再換部新 Hi-Fi 組合。

說句再見

朝早返工,見到架 TÛRANOR PlanetSolar 仲未走,於是走去海港城看一看,見到海運碼頭的工作人員開始準備工作,相信這架全太陽能動力雙體船即將離開,所以在海港城等了十多分鐘,最後看著這艘船離開,還見到有船員在船頂上與岸上的人揮手,PlanetSolar 再見!

2011年8月17日星期三

隨手拍攝



講影相,我沒有天份,亦沒有打算讀攝影,因為現在我對攝影一點興趣也沒有,對我來說,攝影是一種搵食工具,只要能夠拍攝出令人接受的相片或影片便可,所以我從來不會投資太多金錢在拍攝器材上,手上的Canon EOS 400D,由第一日推出用到現在,原來已經用了五年,而且我不相信「貴機配貴鏡」與「靚相」有直接關係,所以這部400D一日未壞,小弟也沒有打算換機。不過,小弟平時很少帶單鏡機出街,所以一直都是使用Canon IXUS 750隨身拍。最近手上有部Olympus E-PL1,發覺防震效果不錯,沒有腳架用1/3s曝光竟然冇明顯手震,今個星期,返工/放工經過海港城,看到從菲律賓到港的TÛRANOR PlanetSolar太陽能動力船,十分有型,便使用E-PL1拍攝,效果不錯。

2011年8月16日星期二

首播紀念


香港數碼廣播有限公司( DBC )數碼大歌台,在 8 月 15 日晚上 9 時正式試播,DBC 第一個主持就係湯正川,沒有數碼收音機的朋友,亦可以到 http://dbc.hk 收聽網上版本。

2011年8月13日星期六

上傳測試

今日無無聊聊,做了一些有關 YouTube 的測試:
  1. 用 RealPlayer 的影片下載功能在香港人網下載〈電台再風雲〉第 1 集,足足一個鐘,有 506MB。
  2. 直接上傳 Flash Video 影片至 YouTube。
  3. 在標籤上加入「yt:stretch=16:9」
結果如下:

2011年8月6日星期六

數碼廣播

講到數碼電視, 2007 年 12 月 31 日開始,小弟都算好早睇數碼電視, 2008 年已經買了一部 Samsung iDTV LA40M86BD 。雖然「早買早享受」,但功能上都有不少缺陷,例如轉台慢、不支援 MHEG-5 互動功能、食電等。幸好係部機用到現在依然沒有問題,因為據聞 Samsung 都有不少壞機,我屋企開電視的時間不短,希望可以用多幾年。


另外,今年年底開始有數碼聲音廣播,香港講數碼聲音廣播,都已經講了十幾年, 1998 年的國際視聽展上,香港電台就以 DAB L Band 進行試播,期間亦測試過 DRM (Digital Radio Mondiale) 與 DAB Band III ,最後就無疾而終。今月 15 及 19 日,香港數碼廣播有限公司(DBC ,前稱雄濤廣播)將會率先開啟兩條頻道「大歌台」與「大戲台」(詳情請看以下節目表)。


不過,數碼聲音廣播要今年年底才正式開始,所以現階段我暫時不會買數碼收音機,暫時都係用一部由 DBC 贈送的收音機聽住先,我響窗邊都收得唔錯喎,住低層竟然可以收爆格。

2011年5月10日星期二

自製眼鏡


身邊的朋友很少入戲院睇戲,所以去戲院睇戲都是「一條友」,早幾期講過小弟去 MCL 德福 6 院欣賞《 3D 肉蒲團》,由於戲院使用 Master Image 3D 系統,所以先用入場派發的眼鏡欣賞。上星期又一個人去睇《雷神奇俠》,竟然又安排在 6 院播放,今次就試用自製的 3D 眼鏡欣賞這套電影,發現能營造正確的前後距離感覺,小弟相信 RealD 與 MasterImage 採用相同的左右眼偏光設計。小弟自製的 3D 眼鏡只是將原有的 RealD 3D 眼鏡拆開,將圓偏光濾片貼在一副舊眼鏡上,將兩副眼鏡二合為一,佩戴一副更適合自己的眼鏡欣賞 3D ,看得更舒服。雖然這副自製 3D 眼鏡很樣衰,但入戲院睇戲,怎會有人留意我的私家眼鏡?

2011年4月24日星期日

回校相認


最近「塗鴉」一詞成為熱門話題,小弟十多年前就讀香港科技大學,一直以來學校都沒有塗鴉文化,大部分地方都很整潔,唯獨是有些地方是充滿貼紙痕跡,這就是儲物櫃了。小弟 94 年讀科大,算是早期的科大生,很多都是全新設備,例如儲物櫃,入學時申請,開啟後看到儲物櫃完全沒有用過,但由於每個儲物櫃都一式一樣,為了讓儲物櫃有自己的特色,所以後來貼了一張「 Panasonic DVD-Video 」的貼紙。

可能大家覺得我「吹水」, 1994 年邊有 DVD ?大家講得冇錯, DVD 正式出街是 1996 年。不過 DVD 格式的前身,其實是 MMCD 與 SD 的合併版(這裡不作詳談,有興趣自己去維基找資料看),在 1994 年的「香港國際視聽展」(仍是香港貿易發展局舉辦),當時幾間日本廠已經宣傳 DVD 格式,而小弟就將其中一張貼紙貼在儲物櫃上,到離開學校也沒有取走。

4 月 22 日,小弟與朋友去科大行一個圈,經過在 4 樓學生會附近的儲物櫃,看到這張被撕了大半的「 Panasonic DVD-Video 」貼紙,就知道這個儲物櫃是小弟曾經用過,呵呵。其實要清理貼紙不是想像中困難,只是用白電油就可以徹底將貼紙清除。

2011年4月7日星期四

轉贈他人


LAMY Vista 用了半年,都唔係太習慣加了筆蓋後,頭輕尾重的感覺,整完支 Parker 筆,諗住將支 Vista 送畀鋼筆同好,反正唔用都係放響筆筒,無謂浪費。

2011年4月6日星期三

自行維修


話說小弟由中學開始,都是一直用鋼筆(有人稱為墨水筆,而日本人則稱為万年筆),多年來,都換過幾支筆,更換的原因不外乎遺失與跌壞筆咀,其中一支跌壞筆咀的,就是 Parker Sonnet Matt Black 鋼咀,老實說, $380 售價話貴唔貴,話平唔平,但爛筆咀寫不出,卻有點心痛。之後買了一支 LAMY Vista ,總是不習慣其重量比例。最近在高登討論區內忽然有人討論鋼筆,於是心血來潮,自行拆筆,原來筆咀那麼容易拆出來,之後再用鉗作簡單修理。雖然現在寫字都有點刮紙聲,但總好過用一支不適合自己的鋼筆吧。

2011年3月29日星期二

熱氣上頂

雖然多休息對身體好,但小弟的睡眠時間一向很短,通常只得 6 、 7 小時。當然,睡眠除了講長度,還要考慮質素,經常睡醒,就好似沒有睡過一樣,十分辛苦。今個星期就因為熱氣,影響睡眠質素,以致心情恍惚,雙眼浮腫兼喉嚨痛,辛苦程度直逼發燒,之後返屋企休息,仲飲了「清熱酷」。不過熱氣不斷上升,由喉嚨及口痛,攪到眼痛,之後一路上升,痛到頭頂,最後到頭皮,慘。

2011年3月22日星期二

又大又圓


剛過去的星期六出現「超級月亮」,香港多雲有霧,看不到。星期一搭船返屋企,看到月亮依然很大,立刻用部 E-PL1 拍下。由於只是隨意拍,拍攝質素只屬一般,請見諒。

2011年3月14日星期一

不斷更新



最近發現家中的電腦出現一個問題,是 Windows Update 經常有更新,前兩日終於忍不住看看是甚麼更新,發覺是一些很舊的更新,於是在網上找尋資料,發覺不斷更新相同的元件間中會發生。要解決這問題,只要在「新增/移除程式」上找尋相同的元件,移除之後,在 Google 搜尋相關的更新檔進行手動安裝便可。

2011年3月11日星期五

熱狗冷馬

香港將非空調巴士稱作「熱狗」,何時有「熱狗」這個叫法?小弟也不清楚。不過,香港的熱狗愈來愈少,現時仍在服役的熱狗都是90年代購入的巴士,這批熱狗比部分空調巴士的服務年期更短,例如九巴最後一批丹尼士巨龍11米,1994年才開始服役,小弟搭5A也經常搭這款車,這條線本來是全熱狗,去年部分班次轉冷氣車,今年內相信會全面冷氣化。

熱狗愈來愈少,小弟沒有特別感覺,由細到大都坐得多,以前讀大學坐「鴨車」上斜,引擎太嘈,想休息都難。最近在竹園看到一架富豪奧林比安11米,有時間便拍下照片,這款巴士是香港最後一款非空調專利巴士,共30架,巴士迷稱這批巴士為「老虎豪」。

2011年3月10日星期四

巨型郵輪


由細到大都很喜歡搭船,喜歡大風吹的感覺,所以我日日搭船返工。如果有機會,真係好想留響架船一個月,呵呵。(圖為 Cunard Line 「皇后遊輪」最新的第 3 代 Queen Elizabeth 「伊利沙伯皇后號」)

2011年3月6日星期日

炭爐雞蛋仔


雞蛋仔相信大家食得多,但係用炭爐燒的雞蛋仔,你可能未必見過。其實好多年前,有不少流動雞蛋仔。不過近年真係用炭爐燒,香港暫時見過就只得銅鑼灣道有一檔,星期六下午約了朋友食飯,等位等好耐,於是買個雞蛋仔食。雖然係流動小販,但竟然要排隊買,前面仲有六個人,做雞蛋仔的老伯每六分鐘左右做兩底,好彩係前面幾個人都係要一底,所以都係等了十五分鐘就有得食。我一直少吃雞蛋仔,沒有研究,但今次食炭燒雞蛋仔,外皮夠脆,感覺不俗,經過銅鑼灣道就不妨幫襯。


以前《 AV Magazine 》辦公室在天后,每日都在這個位置,看到這兩個街名,都覺得好有趣。銅鑼灣的英文係 Causeway Bay ,但「銅鑼灣道」的英文名稱是「 Tung Lo Wan Road 」,而「 Causeway Road 」的中文名稱是「高士威道」,原來有段故事,有興趣自己找找相關資料吧。

2011年3月2日星期三

一紙雜誌


去便利店,很少留意雜誌架,昨天才知道在 7-11 有一份「一紙雜誌」《黑紙》(已經推出了 3 期),是一頁 16 開對摺的月刊,每張 $1 。姑勿論這份自稱「偽娛樂雜誌」是否賺錢,但製作《黑紙》的人,絕非普通人物,包括填詞人林日曦、叱咤 903 DJ 陳強及阿 Bu 。老老實實,小弟做所謂的 IT 雜誌(包括電腦書、影音書、各大報紙雜誌的 IT 版、 IT 新聞網站)記者,最怕就是遇到娛樂記者,這班記者很惡,對其他人(甚至大會)毫不尊重。雖然小弟已經很少出席記者會,但從同事口中,得悉他們的態度沒有太多改變。《黑紙》擺明向這批娛記「挑機」,真係唔好講笑。

2011年2月24日星期四

新刀體驗


由細到大都係用剃刀,因為以前用「超凡」( Schick Ultra )剃刀唔貴,後來見到 Gillette 推出震動剃刀 M3 Power ,手痕買了。用了一段時間,又見到 Schick 推出 Quattro Energy 「創 4 紀鋒動」,之後再轉用 Schick ,近年配合 Quattro 4 Titanium 4+1 刀片,好胋面,但刀片後的造型刀,令鬚根沒有位置走動,所以鬚太長、不用剃鬚膏者不宜使用。


早幾天,見到 Gillette Fusion 體驗版(包括 Gillette Fusion 、 Fusion HydraGel 與 Fusion HydraSoothe Shaving Balm )賣 $69.8 ,本來對水潑式移動的 Fusion 刀頭沒有興趣(而且刀片實在太貴),不過想試試技補濕,但又唔想買咁大支,所以索性買個體驗版試試,感覺不錯,尤其是在乾燥天氣,對皮膚更好保護。不過小弟多汗,夏天似乎不太適用,所以將來都不會買 Shaving Balm 。反而 HydraGel 在早年曾經用過,剃鬚特別暢順,近年愈來愈難買到平價的 NIVEA 剃鬚膏,價錢與 Fusion HydraGel 差不多,所以用埋支 NIVEA 以及在 Apita 買的 KAI 剃鬚膏之後,好大機會轉用 Fusion HydraGel 。

2011年2月22日星期二

迷彩雨傘


在 2008 年 6 月,小弟買了一把梁蘇記( Leung So Kee )縮骨遮(詳請可按此),曾經在八號風球下試用,結果主骨歪了,維修之後,感覺上依然有少少內傷,事隔兩年再修理,結果換了整條主骨,雨遮開關順暢不少。不過,在修理同時,小弟亦買了一把新遮,原因不是貪新忘舊,而是舊遮只得 21 吋,太細,所以買了一把 24 吋遮。遮骨比舊遮更粗,十分堅固,遮布則採用迷彩面加銀底,其實本來想選擇藍面加銀底遮布(這個組合的防晒度最好),但舖內只有黑面黑底,太吸熱,店舖負責人話要訂造,售價一樣( $358 ),但要等,她建議可以做迷彩面加銀底,因為有訂單做這款遮布,一個星期完成,最後退而求其次,選擇這款遮布,呵呵。

2011年2月21日星期一

睇演唱會


老老實實,小弟好少真金白銀買飛入場睇演唱會,一來我好怕熒光棒在我眼前搖動,睇演唱會,隻眼會痛,就算有免費飛我多數唔去,二來唔多鍾意聽歌,或者話,對好多歌手的演繹冇乜感覺。不過,尋晚亢帥克與香港業餘管弦樂團、 The3Think 的《星光演奏廳》,小弟罕有地買飛入場睇。演唱會在上環文娛中心劇院舉行,座位 480 ,雖然較細,但入場看的人士,都是盡情投入。


演唱會以香港業餘管弦樂團作序幕,之後有 The3Think 的電子音樂,亢帥克演唱多首在《亞洲星光大道》所演唱的歌曲,再有 The3Think 樂隊演唱 4 首歌曲,還有星光家族李雯珊、古卓文客串演出,最興奮的是李家仁醫生在香港業餘管弦樂團演奏下演唱〈小明上廣州〉原版與清唱英文版的上半段(所以在台上台下個個都叫李醫生做小明,呵呵),演唱會時間不長,約兩個半小時,最估唔到的開始時間頗準時,只是遲了 10 分鐘,香港業餘管弦樂團演奏時間禁止遲到人士入場,絕對要讚,不過場中竟然有兩個人用閃燈拍照,可惡!